RTI Act hmanga zawhna chhanna inang lo

Mizo Zirlai Pawl (MZP), Zobawk branch chuan thuchhuah siamin, Zobawka State Sports Academy siamna tura sum ruahman zat leh hman tawh zatte RTI Act hmanga an dilnaah Planning & Programme Implementation department leh PWD chhanna a inmil lo niin an tarlang.

Zobawk MZP tarlan danin, Planning department-in RTI Act hmanga zawhna December 16, 2014-a an chhan dan chuan, Zobawk State Sports Academy atan sorkar laipui aṭangin May 27, 2009-ah sum hmuh niin, sum ruahman zat chu cheng nuai 1576.16 a ni a; contractor chu R Sang­khuma, Khatla, Aizawl a ni. PWD superintending engineer (Project Cirlcle)-in RTI Act zawhna December 19, 2014-a a chhannaah erawh chuan project atana sum ruahman chu nuai 1751.24 a ni.

PWD SE (Project Cirlcle) chuan, State Sports Academy atana sum hman ral tawh zat chu cheng nuai 362.96 a nih thu leh sum la hman loh chu nuai 1388.28 a nih thu a tarlang a; Planning department chhannaah chuan, August 2, 2010-ah first installment cheng nuai 630.45 pek chhuah a ni thung.

State Sports Academy hi contract agreement ang chuan June 22, 2014-a siam zawh tur a ni a, mahse VAT-ah buaina a awm vangin February 22, 2015-a zawh tura tih leh a ni. Hun tiam chhunga siam zawh loh chuan a ṭul anga pawhsei leh theih a ni bawk.

Sports Academy siam zawh hun tur zawhna chu Planning lam chuan June 31, 2015 tiin an chhang a, mahse June thlaah ni 31 a awm loh avangin Zobawk MZP chuan chhanna chu mak an tih thu an sawi.