Destination North East 2020 Mizoram pualin Virtual Festival

Sorkar laipui hnuaia Ministry of DoNER leh North Eastern Council (NEC)-in Destination North East 2020 an buat­saih mekah nimin khan Mizoram pualin Virtual Festival neih a ni a, chief minister Zoramthanga'n a hmanpui.

Hmarchhak state pariatte tourism lama tihlârna turin DoNER leh NEC chuan internet kaltlangin ni li awh tur Virtual Festival an buatsaih a, nimin kha a ni thumna niin, Mizoram puala hman a nih angin Mizoram bik pholanna leh sawihona hun darkar khat chhung neih a ni. He video conferencing-ah hian CM Zoramthanga khuallian a ni a, Tourism minister Robert Romawia Royte khualzahawm a ni.

Chief Minister chuan, Mizoram chu Pathian kutchhuak, chei danglam ngai loa hmun mawi, eco-tourism lama ṭhang mek a nih thu sawiin, "Khualzin tam zawkin Mizoram an tlawh theih nan hmalak dan tur rahbi mumal taka duan a ni a, Mizoram Responsible Tourism Policy 2020 siam a ni," a ti.

Adventure sport lama tuite tan Mizoram chu hmun duhawm nia sawiin Zoramthanga chuan, "India ram hmun danga la tih ngai loh International Paragliding Accuracy Championship chu Serchhipah neih a ni tawh a, Reiekah Adventure Theme Park, Thenzawlah Golf Resort hawn tharte a awm a, khaw hrang hrangah zin mite tana tlawh châkawm tur hmun nuam leh mawi tak tak a awm," a ti a; zin mite himna turin tourist police din a nih thu a sawi.

Tourism Minister pawhin thu sawiin, tourism lama hmasawn nan nasa taka ṭan lâk mek a nih thu leh rural tourism tihlâr tum a nih thu a sawi a, "Mizote hi mi hlim thei, mikhualte chunga ṭhat chhuah ṭhin kan ni. Covid-19 hripuiin ram pumpui a tihbuai mek lai pawhin India rama a vawi khatna atana survey neihah Mizoram chu 'Happiest State of India' atan thlan a ni," a ti.

Destination North East 2020 hi September 27 khan Union Home minister Amit Shah hoin ṭan a ni a; India ram bakah, ram dang aṭang pawhin internet kaltlangin chhim theih a ni. Nimina Mizoram puala hun hmanah hian Mizo hnam làm chi hrang hrang entir a ni a, footballer Jeje Lalpekhlua leh hockey player Lalremsiami ten thutawi an sawi bawk.