Ration card ennawn mek zel a ni; October aṭangin ration buhfai man thar
Food, Civil Supplies & Consumer Affairs (FCSCA) department-in veng tina a din Non-Food Security Act (NFSA) Selection Committee chuan ration card an ennawn mek a, ṭhenkhat chuan an zo tawh. Hetih lai hian, ration card vár bikte tana buhfai man bituk thar chu Aizawlah chuan October 2024 aṭangin hman a ni dawn.
Vanglaini palai zawhna chhangin FCSCA minister B Lalchhanzova chuan, ration card ennawn chu ṭha taka kalpui mek a nih thu a sawi a, "Aizawl khawpui bikah ration card ennawn hmasak a ni a, zawh a nih hunah thingtlang lamah ennawn ve leh a ni ang. Veng eng emaw zatah NFSA Committee-in ration card ennawn hna an zo tawh a, mipui hmuh theih turin an tár chhuak tawh," a ti.
Supply Minister chuan, ration card ennawn chu a dik thei ang bera kalpui tum a ni tih sawiin, "Party ang pawhin headquarters aṭangin tu mah inrawlh lo turin kan hriattir. NFSA Committee-ah hian venga a hotu ber chu local council chairman (committee-ah vice chairman) an ni a, kan party-in LC-ah sorkar siamna kan nei mang lo," a ti a, dik taka kalpui an tum avangin uluk takin committee din a nih thu a sawi.
NFSA Committee-te an pawimawh thu sawiin B Lalchhanzova chuan, "Keini lamin theihtawpin vilpui mah ila, chhungkaw tin kan hre ve lo a, committee-te an pawimawh hle. Anni hian dik taka an kalpui ngei pawh kan ring. An ennawnna an rawn thehluh hunah complaint a awm a nih erawh chuan uluk takin kan zir chiang ang," a ti.
FCSCA Minister sawi danin, NFSA Committee-te hian ration card an ennawn zawh hunah an veng chhungah mipui hmuh theih turin an târ chhuak tur a ni a, sawi duh nei tan thlen theih a ni dawn. Complaint a awm chuan NFSA Committee-in zir chiangin thutlukna an siam ang a, chumi hnuah bialtu DCSO-ah an thehlut ang.
DCSO hnena an thehluh hnua complaint a awm a nih chuan department-in uluk taka zir chiangin thutlukna a siam ang a, chumi ang chuan ration card pek chhuah tur a ni.
Aizawl bika ration card ennawn chu September thla chhunga zawh hman ngei an beisei thu sawiin B Lalchhanzova chuan, "Department-in uluk takin a vil reng. October thla aṭang chuan ration card var tana buhfai man thar Aizawlah hman ṭan tawh tur a ni. Thingtlang lamah chuan ration card ennawn zawh a nih hunah hman ve a ni chauh ang," a ti.