KHAWTHLIR

State Election Commissiom chuan nimin khan hriattirna tichhuakin, local council la inthlang lo awm chhun Ramhlun South Local Council inthlan hun atan September 10, 2020 ruat a nih thu a puang. Inthlanah hian zing dar 7 aṭanga tlai dar 5 chhung vote thlak theih a ni dawn a, vote thlak zawhah vote tlate chhiar nghal a ni ang.

State Election Commissioner chuan nimin khan notification tichhuakin, village council leh local council inthlan kaih­hnawiha Model Code of Conduct puan chu in-thlan leh a kaihhnawih­te zawh a nih tawh avang-in tihtawp a nih tawh thu a tarlang. Hetih lai hian, la inthlan ve lohna Ramhlun South Local Council huam chhungah chuan a la nung reng thung.

State Referral Hospital-ah nimin khan Covid-19 vei mi panga leh vei rinhlelh vangin mi pakhat dah luh an ni a, anni nen hian SRH-ah Covid-19 vei vangin mi 59, mipa 47 leh hmeichhia 12, kum 5-78 inkar  enkawl mek an ni. SICU-ah mi pakhat leh Isolation ward-ah mi 58 an awm a, harsatna lian tham nei an awm lo.

Assam Rifles-te chuan September 6, Pathianni khan Melbûk, Champhai district-ah ram dang siam meizial (cigarette) báwmpui (case) 100 an man a, tualchhunga hralhna ang chuan cheng nuai 130 man a ni. AR-te hian cigarette neitua puh leh cigarette-te chu Champhaia Customs hnenah an hlan a ni.

Mizoram state quota-a professional course hrang hrang, NEET leh JEE-in a huam lohte zir tur thlanna, State Medical and Technical Entrance Examination (SMATEE) 2020 dilna thehluh theih hun chu September 11, Zirtawpni chawhnu dar 2 thleng pawhsei a ni. Mizoram chhung leh páwna diploma course hrang hrang zir tumte tana application form lak leh thehluh hun chu September 11 thleng pawhsei a ni bawk.