MRB Day pualin ṭanpuina pe

Mizoram Rural Bank (MRB) chuan September 27-a an din champha vawi 37-na lawm nan nimin khan a thlàwna thisen pek kaihhnawihah a ṭula hman turin Association for Voluntary Blood Donation (AVBD) hnenah Rs. 20,000 an pe a; a hmain pawl/hmun panga hnenah ṭanpuina an lo pe tawh bawk.

MRB chairman V Jaya Chandra chuan, MRB din champha a thlenin mi dang tana malsawmna ni turin ṭanpuina an pek chhuah ṭhin thu a sawi a; MRB chu kum 1983-a din a ni a, Mizorama bank zingah branch ngah ber niin, Mizoram pumah thawktu mi 458 an awm mek thu a sawi bawk. Pawisa hi V Jaya Chandra chuan AVBD president C Lalnunnema hnenah a hlàn a ni.

Kumina MRB Day pual thilpek an hlan dangte chu - SRH-ZMC hnenah water purifier pali, TNT (Aizawl, Lunglei, Kolasib leh Champhai), Operation Kingdom Ministry Home (Phunchawng), Horeb Retreat Centre (Bethlehem Veng) leh Vàn Palai Home (Leitan Ramthar)-te a ni.