BSF-in ramri-ah silai 30 an man

Mamit district chhung khawthlang lam, Bangladesh nena inrinaa ramri vengtu 90th Bn. BSF sipaite chuan September 28, Thawhṭanni zan khan dan loa tawlh silai, AK-47 rifle 28, AK-56 rifle leh carbine pakhat ve ve leh, silai mu tam tham tak an man.

BSF inspector general Sunil Kumar chuan, silai leh a mu an mante chu Phuldungsei khaw bula an man a nih thu leh, silai tawlhrûknaa mawhphurtua rinhlelh mi pathum an man thu a sawi a, "Silai hi khawi lama tawlh tur nge kan la hre lo a, Myanmar lam aṭanga rawn kal nia hriat a ni," a ti.

BSF hotupa chuan, silai tawlh rûk an man theih chhan chu hmun hrang hrang aṭanga thu an dawn vang a nih thu leh thawhhona ṭhat vang a nih thu sawiin, tualchhung mite pawhin an ṭawiawm ṭhat thu a sawi.

Silai leh a mu mana mawh­phurtua rinhlelhte lakah Marpara Police Station-ah Arms Act, 1959 tlawhchhanin thubuai ziah a ni a, thu zawhfiah turin Mamit Police Station-ah lak a ni ang.

BSF-in silai an hman thu an hriat hnuah Mamit SP Shashank Jaiswal chuan nimin zing khan Phuldungsei a pan nghal a; nimin chhunah khan BSF hotute nen Mamitah kalin, SP pisaah thuthar thehdarhtute an kâwm a ni.