Sialhawk leh Muallungthu khuaah Lakhuihthei thar chhuah a pung

Tunlai hi lakhuihthei thar tam lai a nih avangin Aizawl leh Mizoram hmun dangah lakhuihthei zawrh chhuah a tam hle a, chu'ngte chu Sialhâwk, Muallungthu leh Keiṭum khua mite thar a ni deuh ber. Sialhâwk khua chuan kum hmasaa an hralh aiin kuminah quintal 1,000 chuangin an hralh tam zawk an inbeisei a, Muallungthu chuan lakhuihthei man aṭangin kuminah Rs. 17,79,675 la lut tawhin an inngai.

Vanglaini palaiin a biaknaah Sialhâwka lakhuihthei chíngtu zinga mi leh Lalmual zau chairman C Lalrorela chuan, kum hmasa aiin kuminah an thar tam zawk an beisei tih sawiin, an la hralh zel rih avangin a zat chiah an la hriat theih loh thu a sawi.

C Lalrorela sawi danin, kum 2019-ah Sialhawk khuain lakhuihthei qtl. 3,000 vel an hralh a, kuminah qtl. 4,000-5,000 vel hralh an inbeisei. A hmunah kg. khat Rs. 12 hisápin an hralh a, lockdown vanga thil a harsat avangin Rs. 10-in an hralh leh a, hei vang hian an sum hmuh tur a tlakhniam phah dawn. Nikumah khawkhéng an tuar a, quintal khatah pum 100-te a awm a ngai a, kuminah chuan quintal khatah pum 80 vel a awm thei. Sialhawk khuaah hian chhungkaw 130 velin lakhuihthei an chíng a; nikuma tam berin quintal 190 an thar a ni.

Muallungthu khuaa lakhuihthei chíngtute pawhin kum hmasa aiin an thar tam a, sum lak luh pawh a tam zawk. Khamrang zauah chíngin, chhungkaw 40 vel an ni. Society chairman C Lalhmachhuana chuan, kuminah lakhuihthei pum 71,187 an hralh tawh a, pum khat chawhrualin Rs. 25-in an hralh a, Rs. 17,79,675 la lut tawh angin an inchhût tih a sawi. Nikumah cheng nuai 14 vel an la lut a, kuminah cheng nuai thum chuangin an khûm a ni.

Hetih lai hian, kum danga lakhuihthei thar tam ṭhin Keiṭum khuaa lakhuihthei chíngtute chuan kum dang an pha dawn lo. Pineapple Grower Association president TC Lallala chuan, "Kumin ang ema tlâkhniam hi kan la nei ngai lo. A rah a tê a, a chhe bawk," a ti.

TC Lallala sawi danin, an khuaa lakhuihthei tharte chu kg. khat Rs. 15-in Aizawl, Champhai leh Serchhipah an hralh tlangpui a, lockdown vangin an buai phah hle. MIFCO, Chhingchhipah Rs. 14-in an hralh ṭhin bawk. Kum dangah chuan lakhuihthei chingtu chhungkaw 27-in qtl. 600 vel an hralh ṭhin a, chu chu kuminah an phâk dawn loah an ngai a ni.