Zirlai mahni inchâwmte chawimawi

Students’ Self-Support Union (SSU), General Headquarters chuan kum tina an tih ṭhin angin September 10, Thawhlehni zan khan zirlai mahni inchâwm zo mi pathum hnenah Self-Support Award an hlan.

Self-Support Award hlanna inkhawm hi Ignite Studio, Aizawlah buatsaih a ni a; minister of state B Lalchhanzova'n a hmanpui a, chawimawina dawngtute chu fakawm a tih thu sawiin, chawi­mawina an dawn chu an bul ṭanna chauh a ni tih hria a, zirlai dangte leh mi tam tak tana êng chhitu ni turin a chah.

Minister chuan, sorkar hna thawk kher loin a nun khawchhuah theih tih sawiin, dinhmun harsa leh khirh tak hnuaia chawr chhuakte tan an thil tawn apiang hmachhawn dan thiam a ṭul thu a sawi a, "Sum hlutna hria a, thawh chhuah leh hman dan thiam a ṭul a, thil tê tham têtê pawh hlut nachang hriaa hlimpui zel theih te, zelthel lohte a ṭul," a ti a; zirlaite chu hun harsaah pawh tuarchhel a, thlen chin apianga nun dan thiam tur leh inrenchem thiam taka awm turin a fuih.

B Lalchhanzova chuan, sorkar emaw, mimal leh pawl emaw anga min duhsaktu leh min khai chhuah tumtute tih thlawn loh a pawimawh thu sawiin, sorkar leh pawl emawte'n hun remchang an siamte hman ṭangkai tum turin ṭhalaite a chah a; hun harsa karah beidawnga loa tawrhchhel a ṭul thu te, pangchang loa rilru huaisen neih a ṭul thu te, hun hman ṭhat a pawimawh thute a sawi bawk.

SSU president Darhmingliana chuan, SSU chu kum 1985 khan Hrangbana College-ah din a nih thu a sawi a, "Din a nih aṭangin zirna tana mahni intodelh tih leh kut hnathawh chawisan tih thupuiah hmangin, Mizo ṭhalaite hnenah kut hnathawh zahthlak lohzia te, intodelh a pawimawhziate vawiin thlengin a la zirtir ṭhin," a ti.