CM hman tur motor thar pathum lei nan nuai 51 sên a ni - MPYCC

Mizoram Pradesh Youth Congress Committee (MPYCC) hruaitute chuan nimin khan Aizawl Press Club-ah thuthar thehdarhtute an kâwm a; Chief Minister hman tur Mahindra Thar pathum lei a nih thu leh cheng nuai 51 sên a nih thu an puang.

MPYCC president Laltawnliana chuan, CM escort vehicle atan tiin CM hman tur Mahindra Thar pathum lei thar a nih thu a sawi a, "Motor-te hian August thla khan Mualpui, Aizawl a thleng tawh. Tunah hian Police Headquarters-ah document tihfel ngai a la awm avangin kawl mek a ni. Motor pathum MZ-01 AC-1900, MZ-01 AC-1901 leh MZ-01 AC-1902 te a ni a, Director General of Police, Mizoram hminga register a ni," a ti.

Mahindra Thar pakhat chu cheng nuai 17 man a nih thu sawiin Laltawnliana chuan, "Pathum leina atan mipui sum cheng nuai 51 teh meuh sên ral a ni," a ti a; a hma lawkin Assembly Speaker motor Mahindra XUV lei nan cheng nuai 28 leh Speaker quarters chei nan cheng nuai 23 hman a nih thu a sawi bawk.

MPYCC President chuan, CM lak luh zawh velah CM Lalduhoma'n press conference-ah CM, minister leh MLA-te tan lirthei lei a nih loh tur thu a puan tih a sawi a, "Mizoram journalist-te'n an hna leh an chanchinbu/electronic media lama harsatna tam tak an tawh lai, sorkar hnathawkte'n hlawh an lak theih loh lai leh mipui phurrit tura petrol leh diesel chhiah nasa taka an tihpun a, road maintenance cess thlenga an tihpun laia inrenchem sawitu berin escort vehicle tih chhuanlama mipui sum nuai 51 lai sênga motor a lei hi mipui zahlohna leh palzûtna dik tak a ni," a ti.

Sorkarna chelhtute mipui sum hmanga an invulh nasat avangin tun hnaiah mipuiah sum lêngvâk a tlem nia sawiin Laltawnliana chuan, "Hei hian nasa takin ruihhlo tawlh a tihluar a, ni tin ruihhlo man, rûkrûk, insuam, inthah, inrawk, ruang chhar, pawngsual leh sualna dang a pung hle," a ti a; chu'ngte chu sorkar sum enkawl thiam lohin a hrin chhuah niin a sawi.

Congress ṭhalai President chuan, minister, minister tlukpui leh VIP ṭhenkhatte bangla leh quarters-te sorkar sum hmanga chei ṭhat a nih thu a sawi a; bangla/quarters-a cheng lo minister pakua - K Sapdanga (nuai 12), Vanlalhlana (nuai 12), Lalthansanga (nuai 12), Dr Vanlalthlana (nuai 12), PC Vanlalruata (nuai 12), F Rodingliana (nuai 10), B Lalchhanzova (nuai 10), Prof. Lalnilawma (nuai 10) leh Lalnghinglova Hmar (nuai 10) bakah, adviser to CM H Ginzalala (nuai 10)-te mimal in chei nan mipui sum nuai 110 hman a nih thu a sawi bawk.