International Literacy Day hman a ni

Nimin khan International Literacy Day pualin Aizawl DC office leh Women & Child Development (WCD) buatsaihin Aizawl DC conference hall-ah hun hman a ni a; Siahaah additional DC Abraham Beirazi Khithie hoin hman a ni bawk.

Aizawla International Literacy Day hmannaa khuallian Aizawl DC Lalhriatpuia chuan, ṭawng hrang hrang thiam a pawimawh thu a sawi a, "Mi dangte nena kan inbiakpawh theihna hian inhriatthiam tawnna a thlen ṭhin. Kan hriatna tizau turin kan chhehvela thil awm leh thil thlengte ngaihven nachang kan hriat a pawimawh. Thiamna kawngah quantity aiin quality a pawimawh zawk," a ti.

WCD deputy director Flora Lalṭanpuii pawhin thu sawiin, ziak leh chhiar thiamna ringawt a tâwk lo a, literacy chu dam chhung daih thil, kawng tinrenga hmasawnna leh hriatna nei tura inzir zelna a nih thu a sawi.

Siahaah pawh Women & Child Development bultumin MADC Golden Jubilee Hall-ah International Literacy Day pualin hun hman a ni. Khuallian additional DC Abraham Beirazi chuan, missionary-te zarah Mizote'n ziak leh chhiar an thiam thu leh tunah chuan India ramah literacy rate sang ber pawl a nih tawh thu a sawi a, "Ziak leh chhiar thiam tam satliah aia pawimawh thiamna zîktluak, thiamna tak tak neih a pawimawh," a ti.

Inkhawm hi district child protection officer Hepaw Hlychho-i'n a kaihruai a; Siaha district-a Beti Bachao, Beti Padhao (BBBP) ambassador P Chaki, Mara Chano Py Gen.Hqrs president pawhin thu a sawi.

International Literacy Day pual hian district pahnihah hian zirlaite tan ‘Importance of girl child education’ tih thupui hmangin lemziak, auhla phuah leh essay ziahahte inelna buatsaih a ni a; Literacy Day hmannaah hian lawmman sem a ni.