Van Dhan Vikas Kendra outlet hawng

Cooperation minister PC Vanlalruata chuan nimin khan Register of Cooperative Societies office-ah Mizoram Van Dhan Vikas Kendra (VDVK) outlet a hawng.

PC Vanlalruata chuan, Cooperation department hnuaia federation-te chu khawvel hmasawnna ṭhang zel mila an inher rem leh an kal a pawimawh thu a sawi a, "Khawvel khawi ramah pawh federation leh cooperative society-te an changtlunna apiang chu ram nuam leh hmasawn chak ber berte an ni zel a, ramin hma a sawn tak takna tur chuan federation leh department-te thawhhona ṭha hi thil pawimawh ber pakhat a ni," a ti.

Pradhan Mantri Janjatia Vikas Mission (PMJVM), Van Dhan Mission tih bawk hi Mizoramah January 23, 2020 aṭangin Cooperation department-in a kalpui ṭan. Scheme hnuaiah hian VDVK 259 din a ni tawh a, VDVK-te hnenah training bakah hmanrua leh châkkhaite a thlawna pek a ni.

VDVK-te thil siam pho chhuahna atan VDVK Outlet buatsaih a ni a, a bul ṭan nan VDVK 32-te thil siam hrang hrang pho chhuah a ni.