Mauah CM-in 'risk' a lâk avangin a chíngtute insurance pe turin ngen

ZPM party ṭhalaite chuan thuchhuah siamin, Assembly House-ah chief minister Zoramthanga huaisen taka thu dik a sawi chhuak chu lawmawm an tih thu an tarlang a; chutih rualin, mau/rua chungchangah CM-in 'risk' a lâk avangin, a chíngtute insurance siamsak turin an ngen.

ZPM ṭhalai chuan, Mizoram Assembly session neih zawh tâkah CM Zoramthanga'n Peace Bonus a awm loh thu leh a phuahchawp a nih thu a puan thu te, mau chungchanga Dr Vanlalthlana zawhna CM-in a chhannaah, D. Brandisii leh D. Latiflorus-te chu kum 20 vel a lo chìn tawh avangin tualṭo (indigenous)-a a ngaih thu a sawi thu te, National Bamboo Mission guideline kalhin chhungkaw tam tak mau chìntir an nih chungchangah 'risk' an la tih a sawi thute an tarlang.

ZPM ṭhalaite chuan, "Huaisen taka kan CM-in thu dik a puan chhuah avang hian a chungah lawmthu kan sawi a ni," an ti. Mau chíng tura thlan chhungkaw tam takte CM-in 'risk' a lâkpui a, a hlawhtlin loha an fairèl bél a ruah theih avangin, mau chíngtute chu assurance a pe thei lo a nih pawhin, insurance tal pe turin an ngen. Mau hralhna leh a rate-ah buaina an awm loh nan 'buy back agreement' siampui turin an ngen bawk.

Minister Robert Romawia Royte-in Mizo Hnam Rúna thu a sawiah, 'SEDP cheng nuai thum a sem theih loh titute hi chu an mâwl chhah hle a ni,' tiin a sawi tih tarlangin ZPM ṭhalai chuan, "Pu Robert Romawia Royte, SYS minister-in session-a SEDP a sawi laia Pu Lalduhoma'n SEDP-a nuai thum a sem theih dan tur House member-te hrilh tura vawi eng emaw zat zawhna a siam chunga chháng ngam loa a hun a hmang ral kha pawi kan ti hle a ni," an ti.