Kolasib bawlhhlawh sâwngbàwlna endik

Deputy speaker Lalfamkima, Kolasib bialtu MLA chuan September 10, Thawhlehni khan Kolasib khawpui bawlhhlawh sawngbawlna hmun, Dihmunzawla Solid Waste Management Centre (SWMC) a tlawh a, bawlhhlawh sâwngbâwl dan a hmunah a enfiah.

Solid Waste Management Centre-ah hian Waste Tech & Bio Energy-in September 2024 thla tir aṭangin bawlhhlawhte an sâwngbâwl ṭhin a, bawhhlawh khawn khawm hna an thawk nghal bawk. Hna thawk­tute chuan, bawlhhlawh ṭawih thei leh ṭawih thei lo paih pawlh an la awm avangin an buai rih thu an lo hrilh a; digital weighbridge an mamawh tih an lo thlen.

SWMC chu pilot project a ni a, a vawi khatna anih avangin hmaih tam tak a awm a rin thu leh Centre-in mamawh a neihte chu a ṭul anga bawhzui a tum thu Lalfamkima chuan a sawi.

Lalfamkima chuan, bawlhhlawh ṭawih thei leh ṭawih thei lo paih pawlh lo tura mipui zirtir uar a ṭul thu sawiin, mipuiin bawlhhlawh sawngbawl dan leh hnathawh dante an hriat a ṭul thu a sawi a; SWMC hmunhmate tihfaia tihthianghlim a ṭul thu a sawi bawk.

Deputy Sepaker hi Kolasib bawrhsap Robert C Lalhmangaiha leh urban development officer Josephine Zonunsangi ten an ṭawiawm a ni.