KHAWTHLIR

Samagra hlawh pe

Mizoram sorkar chuan Samagra Shiksha hnuaia thawkte thla thum hlawh a pe chhuak tawh. Thu dawn danin, hlawh pek hi kumin June, July leh August thla hlawh a ni a, Samagra thawktu ṭhenkhatte chuan nimin khan an dawng tawh a ni. Hetih lai hian, Environment, Forest and Climate Change department hotute aṭanga thu dawn danin, Dampa Tiger Reserved-a thawktute hlawh kumin March thla aṭanga la pek loh pawh vawiin hian pek beisei a ni.

Thisen pe

UPC (Mizoram) Pathian thu zirna, Apostolic Theological Institute chuan nimin khan Durtlanga an hmunah thisen pek an huaihawt a, Synod Hospital tan thisen unit 21 an pe.

HMV tlan phal lo

Kawnpui leh Durtlang inkar state highway-a Zanlawn daiah kawngpui a min avangin lirthei lian (HMV) tlan khap a nih thu Kolasib SP David H Lalthangliana chuan a tarlang. Thuchhuah chungchanga harsatna tawk emaw, report tur neite chuan Kawnpui Police Station officer in-charge phone number 9233966362-ah biak theih a ni.

Khawzawlah gas home delivery

Khawzawl bawrhsap K Vanlalṭhiana hoin nimin khan sorkar hotute'n eirawngbawlna gas (LPG) home delivery kalpui dan tur an sawiho a; September 18, 2024-ah gas home delivery kalpui ṭan theih beisei a nih thu an tarlang.

Dr R Lalzauva vui

Mizo zinga medicine-a doctor specialist hmasa ber Dr R Lalzauva (79) h/o Lalremliani (L), Dawrpui chu nimin zing dar 3:10 khan a thi. September 27, 1945-a piang Dr R Lalzauva hian December 1972 khan MBBS a zo a, Ocober 1982-ah Madras Medical College aṭangin medicine-ah specialist (MD) a zo leh. Upa R Lalzauva hi nimin khan Dawrpui Kohhran Centenary Hall-a thlahna hun hman a ni a, chawhnu dar 2 khan Dawrpui kohhran biak-inah Aizawl Central Presbytery moderator Upa C Lalpara'n a vui a ni.