KHAWTHLIR

PYD (NEI) Aizawl City Coordination Committee-in PYD Social Works Day puala Blood Donation Week an buatsaihah nimin khan thisen an pe chhunzawm a, Mualpuia UPC (NEI) hmunpuiah Aizawl Civil Hospital tan thisen unit 68 pein, a petute mipa 53 leh hmeichhia 15 an ni. September 28 khan mi 72-in an lo pe tawh bawk. Haulawng bial PYD (NEI) pawhin nimin khan Hausiampa Hall, Haulawngah thisen pek rûnpui an huaihawt a, mipa 88 leh hmeichhia pathumte'n Lunglei Civil Hospital tan thisen unit 91 an pe a ni.

State Referral Hospital-ah nimin khan Covid-19 vei mi pakhat dah luh thar a nih laiin, dam tawh mi 12 chhuahtir an ni a, mi 12 enkawl mek an ni. Chhuahtir zingah MDR-TB vei, ICU-a enkawl tawh ṭhin pawh a tel. Enkawl mek mi 12 zinga pakhat chu ICU-a a awm a, a bak chu ward-ah an awm a ni.

Hunthar Venga National Highway-54 kawngpuia lei tlahniam vanga harsatna awm ṭhin tihziaawm nan Vaivakawna lut turin RCC hmangin PWD-in approach road an siam dawn a; a hmunhmate chu nimin khan bialtu MLA Lalruatkima, minister of state leh PWD hotute'n an enfiah. Kawng siam tur hi metre 330 vela thui, metre 3.3-a zau tur a ni a, sum ruahman nuai 166 chuang hmangin hna thawh ṭan aṭanga thla ruk chhunga zawh tura tih a ni.

Siaha DC Kesavan R chuan nimin khan Rama Filling Station, Siaha a tlawh a, lei hnuai tanky-a tuialhthei ṭhat leh ṭhat loh dan leh pump-in tuialhthei a pek chhuah zat a dik leh dik loh a enfiah. Bawrhsap hian filling station a thlen hnuah Legal Metrology department hotute koin, endik hna thawh a ni.

K Remruatfela lehkhabu ziah, 'Amity zin kawng bumboh' tih chu nimin khan minister of state Robert Romawia Royte-in a pisaah a tlangzarh. Minister chuan, khawvel media chak tak karah, mipui, a bikin ṭhalaite'n lehkha ziak leh chhiar kawngah ṭan an lâk thar a ṭul thu a sawi.