Swab sample dahṭhatna tur lei dawn

Health & Family Welfare department chuan thuchhuah siamin, Chief Minister's Relief Fund aṭangin Covid-19 vei leh vei loh enfiahna tura swab sample lâkte rei zawk vawn ṭhat a nih theih nan hmanrua lei a nih dawn thu an tarlang.

HFW department tarlan danin, Aizawl tih loh district 10-ah TrueNAT laboratory din tura hmalak a ni a, TrueNAT Quattro kháwl leh a mamawh hmanraw dangte chu CM Relief Fund aṭangin lei tura ruahman a ni. Lei tura tih zingah chuan biological sample - DNA, RNA, proteins, cell extract leh Covid-19 sample positive-te hun rei tak vawn thatna tur Ultra Low Temperature Deep Freezer a tel.

Indian Council of Medical Research (ICMR)-in June 25, 2020-a guideline thar a tihchhuahah, sample dahṭhat nan –80 degree centigrade ultra low temperature deep freezer hman tura tih a ni. Committee on Utilisation of CM Relief Fund for Covid-19 chuan YORKO Sales company siam –80 degree centigrade ultra low temperature deep freezer pakhat Rs. 4,30,000 man lei turin thutlukna a siam a, pasarih lei a ni dawn.

–80 degree centigrade ultra low temperature deep freezer leite chu Siaha, Champhai, Serchhip, Lawngtlai, Mamit, Khawzawl leh Hnahthialah dah tum a ni a; Lunglei, Kolasib leh Saitualah chuan a awm sa a ni.

Health department chuan, inkhàrkhip laiin rokhawlhna a awm ṭhin avangin duh angin hmanrua a thleng hma thei lo tih a tarlang a; deep freezer chuan gas a hman reng a ngaih avangin, thlawhtheihnaa phurh a rem lo a, tunah hian kawngah a thang mek a, tun kar chhungin Mizoram a thlen beisei a nih thu an tarlang bawk.