RD department-in an hnathawh Mipui hriat turin an puangzar

Rural Development (RD) department chuan, nimin khan Aijal Club-ah an hmalakna hrang hrangte mipui hriat theih turin thuthar thehdarhtute an hrilhfiah a; RD minister R Lalzirliana'n a hmanpui.

R Lalzirliana chuan, RD department hmalakna sawiin, "Thingtlanga chengte eizawnna ngêlnghet an neih theih nan te, hmasawnna lama rotling tak an neih theih nan te, khawpui lama ei zawnga pém lo a, an khua ngeia lungawi leh ngêlnghet taka awmte chu a thil tum ber a ni. Chhiarpui hnuhnung berah Mizoramah mi 10,97,206 kan awm a, chu'ng zinga 5,25,435 (47.88%) chu thungtlang lama khawsa an ni," a ti.

RD Minister sawi danin, RD department-in CSS hrang hrang - Mahatma Gandhi National Rural Employment Gurantee Act (MGNREGA), Pradhan Mantri Awaaz Yojan (Grameen), Pradhan Mantri Krishi Sancha Yojan (PMKSY), Border Area Deve-lopment Programme (BADP), National Rural Livelihood Mission (NRLM) leh State Training Indistitute (SIRD) a kalpui mek.

CSS bakah hian state plan fund aṭanga duan Rural Housing Scheme, North Eastern Council leh Non-Lapsable Central Pool of Resourses (NLCPR) hnuaiah scheme hrang hrang an kalpui bawk.

MGNREGA hnuaia hmalakna sawiin R Lalzirliana chuan, "Finance leh Planning department nen kan thawhho ṭhat avangin sum lak chhuah zung zung theih a ni. Thawhhona ṭha hian thingtlang lama chengte tan malsawmna tam tak a thlen a ni tih kan hriat a pawimawh," a ti a; state matching share-ah pawh harsatna an neih ngai loh thu a sawi.

RD Minister chuan PMKSY chungchang sawiin. "PMKSY hnuaiah Housing for All kalpui a ni a, kum 2022-ah hlen tum a ni. Sorkar laipui chuan kum 2016-17 aṭanga 2018-19 chhungin in vaibelchhe khat sak a tum," a ti.

R Lalzirliana sawi danin, MzSRLM hnuaiah Kolasib leh Serchhip district-ah hmalak ṭan a ni a, khaw 36-ah self help group (SHG) 742 din a ni tawh. SHG-te'n sorkar aṭanga sum faia ṭanpuina an dawn tawh chu cheng nuai 207.68 a ni a; TATA Trust sum hmanga hna thawktu NEIDA nen ṭangkawpin Serchhip district-ah chhungkaw 966 tan vawk pahnih vulh theihna tur cheng nuai 92.86 hmangin sak a ni bawk.

MzSRLM hnuaiah hian kumin sorkar kum chhungin Khawbung block, Champhai block, West Phaileng block, Zawlnuam block, Tuipang block leh Sangau block-ahte hmalak tum mek a ni.

IWMP hnuaiah kum 2016-17 atan budget-ah cheng vbc. 38.35 dah a ni thu sawiin RD Minister chuan, "Annual Action Plan 2016-17 approved tawh chu cheng vbc. 143.79 a ni a, Central share kan dawn tur first instalment hmuh thuai beisei a ni. Tunah hian IWMP hnuaiah hian khaw 300 tuam a ni a, project 89 kalpui mek a ni," a ti.

R Lalzirliana chuan, international border hrûla awm RD block 16-ah BADP kalpui a nih thu sawiin, "Block 16-ah hian hmasawnna hna chi hrang hrang thawh ṭhin a ni. Kum 2016-17 atan sorkar laipuiin cheng nuai 4600 a ruahman a, cheng nuai 4140 chu a rawn pe tawh," a ti a; Annual Action Plan thehluh hma vangin Mizoram chu sum pek hmasak state pathum zingah a tel thu a sawi.

Inkhawmah hian RD under secretary Paul L Khuma'n 'Orientation of the press on the aspects of various Rural Development department schemes' tih hmangin thu a sawi a; Khawzawl BDO Lalrinzuala'n 'PPT on innovative practices and way forward' tih thupui a sawi bawk.

Paul L Khuma chuan an hnathawh hrang hrangte sawifiahin, PMKSY hnuaiah Mizoramah in 20,000 chuang sak a nih dawn thu a sawi. Zawhna chhangin RD hotute chuan, UDPA department-in Housing for All an kalpui mek leh PMKSY hnuaia in sak ṭanpuina dawng turte thlan kawp an nih lohna atan ruahmanna siam a nih thu an sawi.

Lalrinzuala chuan, an department hnuaia scheme hrang hrang kaihkawpa hna an thawh dan leh department dangte nena ṭangkawp hna an thawh dan a sawifiah a, "A hrana hnathawha ṭha vak loa tih ai chuan, kaihkawpa hnathawh hi a ṭhat avangin kaihkawp dan kan zawng ṭhin," a ti a; ṭanpuina dawngtute'n ṭhahnem an ngaih zawkna atan ṭanpuina dawng turte sum tlem a zawng thawh tir ve pawh an uar thu a sawi.