Wireless radio system lei dan HFW department-in an sawifiah
Health & Family Welfare department chuan thuchhuah siamin, Covid-19 dona kaihhnawiha wireless radio system an lei chungchang an sawifiah a, "Wireless radio system hian walkie-talkie handset chauh a huam lo a, antenna, battery leh charger, etc. a tel a ni," an ti.
HFW department chuan, Covid-19 donaah Mizoram chhung hmun hrang hrang, a bikin ramri hnaih lamah Covid-19 luh theihna tur nia ngaih hmun chi hrang hrangah medical check post siam a ni an tarlang a, "Medical checkpost tam zawk hi ramri dep hmun kilkhawr taka awm a nih avangin, mobile phone network-in a cover phak loh bakah, telephone connection a awm lo hrim hrim a ni," an ti a; chu'ng checkpoint aṭangte chuan rang taka report inpek a nih theih nan wireless radio syste chu ṭangkai ber tura ngaih a nih thu an tarlang.
Health department chuan, an dinhmun thlirin, June 10, 2020 khan Purchase Committee Meeting on Mizoram State AYUSH Society-in wireless radio system lei a rel tih a tarlang a, "He wireless radio system hi Mizoram chhungah BL Wireless System, Ramhlun Venglai chu a supply thei awmchhun an nih avangin anni hi thlan nghal a ni," an ti.
Wireless radio system chungchang hi September 1-3, 2020 chhunga Assembly session neih tâkah khan zawhna (unstarred) chhannaah a lang a; chutah chuan wireless radio system pakhat man zatve (50%) pek lâwk atan Rs. 6,20,000 hman a nih thu tarlan a ni.