President-in MZU Convocation a hmanpui Ram hmasawnna tura thawk turin ṭhalaite a chah
President Pranab Mukherjee chuan nimin khan Mizoram University (MZU) Convocation vawi 10-na a hmanpui. President chuan, Mizo ṭhalaite chu India ram hmun danga mite ruala India ram hmasawnna tura theihtawp chhuah turin a chah.
MZU Convocation hi chawhma dar 11:15-ah ṭan a ni a, vice chancellor Prof. R Lalthantluanga'n inlawmna leh MZU chanchinte a sawi a; President-in thu a sawi bakah, Governor Keshari Nath Tripathi leh chief minister Lal Thanhawla ten thu an sawi.
President Pranab Mukherjee chuan, MZU Convocation-a a tel thei chu lawmawm a tih thu leh Mizoram zinna remchang a nei chu a lawm thu te, Mizoram chu ram mawi tak a nih thu leh MZU hmunhmate chu mawi a tih thute a sawi a; Bangladesh leh Myanmar ram rîtu a nih avangin state pawimawh a nih thu sawiin, "Mizo tualzál nunah inthliarna a awm lo a, in inpawh em em a, mi dangte ṭanpui duhna thinlung in nei a, mi in lawm thiam hle a ni," a ti.
President chuan, India-in kawng hrang hrangah chak takin hma a sawn tih sawiin, hma a sawnnaah ṭhalaite an pawimawh hle tih a sawi a, "India ram hmun dangah ṭhalaite tana remchanna a inhawng zel angin, Mizoram ṭhalaite tan pawh hun ṭha leh remchang a inhawng zau zel a, hei hi Mizoram ṭhalaite'n hmang ṭangkaiin, hmun danga ṭhalaite nen inlungruala ram hmasawnna tura thawhho a pawimawh a ni," a ti.
Pranab Mukherjee chuan, India rama Central university zawng zawngte chu an awmna bialah a tlem berah thingtlang khua panga tal 'Adopted village' ah puangin, an hmasawnna turin hna an thawhsak dawn tih a sawi a, "Chutah chuan Mizoram University pawh an tel ve a ni," a ti a; Central university-te chu higher education-a hmahruaitu tur an nih thu a sawi.
Zirlai zo tharte chu a lawmpui thu a sawi rualin President chuan, an hma lam hunah kawng thui tak zawh tur leh zir tur tam tak a la awm thu a sawi a, "Tunah hian khawtlangah tih theih tur tam zawk in nei a, nangmahni-ah mipuiin beiseina sang tak an nei a ni. Lehkhathiamteah hian mawhphurhna sang tak a innghat a ni," a ti a; an nih tum an nih theih nana bei zel turin a fuih.
Delhi khawpuia hmarchhak ṭhalaite chunga harsatna thleng ṭhin chungchangah President chuan, Central leh Delhi sorkarin an tih turte an tih zel thu a sawi a, "Thil sual titute hrem an ni a, a thlen tawh loh nan a ṭul ang zela hmalak a ni," a ti.
President Pranab Mukherjee chuan MZU chu kum 14 chauha upa ni mah se, university ṭhang duang tak a nih thu a sawi a, "Nikum mai khan NAAC-in Grade 'A' a pe thar a, ka lawmpui tak zet a ni," a ti.
University-te leh zirna-in hrang hrangte chuan zirlaite thiamna pek kawngah leh an rilru buatsaih kawngah mawhphurhna sang tak an nei tih sawiin, MZU pawhin zirna lam leh kawng hrang hrangah hma a sawn zel dawn a, chak takin a ṭhang zel dawn tih a sawi.
MZU Convocation-ah hian President Pranab Mukherjee hian MZU aṭanga master degree nei thar, subject tina tiṭha ber (gold medalist) mi 39-te hnenah medal a hlan a; MZU vice chancellor Prof. R Lalthantluanga'n MZU aṭanga doctor of philosophy hmu thar mi 31 hnenah certificate a hlan.
Convocation-a degree certificate hlante hi Ph.D hmu mi 31, master of philosophy mi 33, master degree-ah mi 303 leh degree course-ah mi 296 an ni.
MZU Convocation a hmanpui zawh hian President hian MZU aṭangin helicopter-in Lengpui Airport a pan a, chawhnuah Mizoram a chhuahsan a ni.