ZPM-in Tractor hman man pe turin phût

ZPM party chuan thuchhuah siamin, Agriculture department hnuaia Chuhvel leh Saikhawthlir phai leileta March - July 2020 chhunga tractor hman man Rs. 6,42,200 chu sorkarin a pe thei lo niin an tarlang a; a rang thei ang bera pe turin Mizoram sorkar an phût.

Chuhvel leh Saikhawthlir phai leileta thla nga chhunga tractor hman man Rs. 6,42,200 sorkarin a pe thei lo chu hriatthiam har an tih thu sawiin ZPM chuan, "Kut hnathawktute tana sum pek chhuah tur vawiin thlenga a awm lo hi a chhan sorkarin sawifiah rawh se. Agriculture Minister hian a ngaihven tâwk loh vang leh kut hnathawktute hrek behnaah kan ngai a ni," an ti.

ZPM chuan, Covid-19 lên lai pawhin Mizoram sorkarin kawng hrang hranga hna thawk reng ang leh sum pawh hna thawhna atana hmang reng angin an insawi tih an tarlang a; August 2019 aṭanga  August 2020 inkarah ringawt pawh mipui hriat lohin cheng nuai tam tak man restricted tender an chhuah tih an sawi.