CM hoin thlai lei dan tur sawiho; Thlai pali man tur bithliah tawh

Chief minister Lalduhoma hoin a pisaah nimin khan Mizoram sorkarin thlai lei a buaipui tur (support price a pek tur) thlai pali lei dan tur ruahmannate thuneitute'n an thlirho. Thlai pali - sawhthing, hmarcha, aieng leh hmunphiah leina man hniam ber tur chu sorkarin a bithliah tawh a ni.

Sorkar thuchhuah tarlan danin, sawhthing chu kum danga tih ṭhin dan angin open market-a kalpui tur a ni a; chutih rualin, open market-ah harsatna awm palh thei a nih avangin, harsatna a lo thlen palha hmalak dan tur sawiho a ni.

Hmunphiah chungchanga hmalak tawh chin pawh sawi a ni a; Mauchar khawtlangin hmunphiah hralhna man an la dawn kim loh avanga harsatna an tawh mek chu chinfelsak ni se, an ti.

Ṭhutkhawmah Land Resources, Soil & Water Conservation minister Lalthansanga, Agriculture and Farmer Welfare minister PC Vanlalruata, Commerce & Industries minister F Rodingliana, adviser to CM pahnih TBC Lalvenchhunga leh Dr KC Lalmalsawmzauva bakah, sorkar official-te an tel a ni.

Sorkar hmalakna leh puihnaa thlai lei tur bik thlan pali hralhna man tur chu Mizoram sorkar chuan a bithliah tawh a; Agriculture and Farmers' Welfare department chuan August 16, 2024 khan hriattirna (notification) a tichhuak.

Notification-ah hian Agricultural Marketing Assurance Scheme (AMAS) hnuaiah thlai leina man (supporting price) zat bithliah a nih thu leh thlai man zat tur tarlan a ni a; sawhthingah grade ṭhen a awm lo a, hmunphiahah erawh grade ṭhen a ni thung.

Adviser to CM (Hand Holding) Dr KC Lalmalsawmzauva chuan Vanglaini zawhna chhangin, thlai pali lei chungchangah hian sorkar chu mediator leh facilitator tur a nih thu a sawi a, "Sawhthing lei duh awm loh chuan sorkarin a lei ang," a ti.

Dr KC Lalmalsawmzauva chuan, aieng man tura bithliah tawhah siamṭhat ngai a awm mai theih thu a sawi a; aieng leitu turte leina man zat chu eng pawh ni se, sorkarin kg. 1-ah Rs 5 a tum ve dawn thu a sawi. Hmunphiah chu a roa lei tur niin, grade chi hnihah ṭhen a ni dawn a, a thar hma - February 10 hma lama tharte chu grade A a ni ang a, February 10 hnu lama mite chu grade B a nih dawn thu a sawi bawk.