Zirlaite kawng kawhhmuhna School Connect

Mizoram Youth Commission, Lynchpin leh Zalen-te chuan nimin khan Chanmari YMA Hall-ah zirlaite hma lam hun atana kawng kawhhmuhna 'School Connect' an buatsaih a, Mizoram Youth Commission chairman Malsawmzuala Ralte-in a hawng.

Malsawmzuala Ralte chuan, zirlaite chu social media tuipui lutuk lo turin a chah a; mahni kea dinga sum leh pai leh mamawh dang thawk chhuak tur leh mi hlawhtling ni turin taimak, tumruh, tei rei peih, thawhrimna leh time table neihte a pawimawh tih a sawi.

Tunlaiah inelna a sang tawh hle tih sawiin Malsawmzuala chuan, "Tih ve mai mai, sikul kal ve tawp, tuipui dang neih ṭuaite hi kan nih dan tur a ni lo. Zirlai kan nih anga kan duty chu ṭha taka zir, thuawih, career plan mumal tak neih a ni a, chu chu puitlinna leh hlawhtlinna kawng, Pathian malsawmna dawn theihna a ni," a ti.

MYC Chairman chuan, School Connect chu zirlaite hma lam huna an kawng zawh tur, nuna hlawhtlinna an neih theihna tura kawhhmuhtu a nih a beisei thu a sawi a; MYC-in coaching class ṭha tak district hrang hrangah a kalpui mek thu a sawi bawk.

School Connect-ah hian Aizawla zirna-in eng emaw zat bakah, Womens Polytechnic leh Industrial Training Institute-te an tel a; vawiinah chhunzawma zawh a ni ang.