Lalruali leh LZ Sailo kum 100 tlin lawm

Mizoram University-a Mizo department chuan nimin khan Synod Conference Centre-ah thu leh hla ruai an buatsaih a; hla phuah thiam pahnih - Lalruali leh Capt. LZ Sailo te kum 100 tlin (birth centenary) an lawm.

Chawhmaah Lalruali kum 100 tlin pualin hun hman niin, MZU Mizo department associate professor Dr Zoramdinthara-in a kaihruai a, Aizawl mayor Lalrinenga Sailo khuallian a ni. School of Humanities and Languages dean Prof. Laltluangliana Khiangte-in thu a sawi a; Johnson College associate professor Lalrammawia Ngente-in 'Lalruali thu leh hla hlutna' tih thupui a sawi.

Chawhnuah Capt. LZ Sailo kum 100 tlin pualin hun hman a ni a, MZU Mizo department-a HoD Dr Ruth Lalremruati'n kaihruaiin, khuallian - chief information commissioner John Neihlaia'n Capt. LZ Sailo hla awm khawmna 'Chhinglung Messenger' a tlangzarh. R Lallianzuala'n 'Capt. LZ Sailo thu leh hla hlutna' tih thupui a sawi.

Lalruali leh Capt. LZ Sailo kum 100 tlin pual hian an thuam leh thil hluite pho chhuah a ni.