Thing veng tura hmalakna hrilh turin High Court-in Mizoram sorkar a hriattir
Gauhati High Court Aizawl Bench chuan Aizawl leh thingtlanga thing kih vak vak veng tura hmalakna a neih emaw, hmalak a tum dan hriattir turin Mizoram sorkar a hriattir.
Thing kih chungchangah hian Gauhati High Court chuan public interest litigation (PIL) an dawng a ni. PIL-ah chuan, 'Aizawl, Ailawng leh Reiekah endikna awm hauh loin an kit nasa hle. Ailawngah hian kawng siam mek a ni a, thing kung lian tak tak, kum 30-40-a upate pawh contractor-te'n an kit. State sorkar emaw, thuneitute hnena phalna an neih sawifiahna a awm lo,' tih a ni.
Mizoram sorkar ukilte chuan Court-ah hian Mizoram sorkarin kum 1996 khan Mizo District (Forest) Act, 1955 Section 15(1) hnuaiah official gazette a chhuah a, Ailawng leh Reiek bakah, khaw danga thingte duh duha kih khap a ni thu an thlen. Hetih rual hian, kum 2017 khan Mizoram sorkar chuan thing kung thi tawh leh tlu, mihring leh bungrua tana hlauhawm senghawi theihna notification chhuah a ni thu an thlen bawk.
Gauhati High Court Aizawl Bench chuan Mizoram sorkar chu mipui leh contractor-te'n thing an kih tihtawp a nih theihna tura ruahmanna a neih mipui hnenah a puangzar ṭha tawk loah a ngai a; Mizoram sorkar ukilte chu Mizoram sorkarin Aizawl leh thingtlanga thing kih vak vak veng tura hmalakna a neih emaw, hmalak a tum dan Court hrilh turin a hriattir a ni.