LRS department pisaa zan lama hna thawkte Minister-in a tlawh
Land Revenue & Settlement (LRS) minister B Lalchhanzova chuan September 11, Nilaini zan khan LRS directorate leh Aizawl district Settlement Officer pisa a tlawh.
LRS department-a Aizawl district chu district pahnih - Aizawl South leh Aizawl North-ah ṭhen tura tih niin, July 25, 2024-ah order a chhuak tawh a, chumi bawhzui chuan LRS department-a thawkte chu August 12 aṭang khan pisa chawlh ní bakah, zan lamahte an thawk ṭhin. Hei vang hian LRS Minister hian a department-a zan lama hna thawkte chu a tlawh kual a ni.
Minister B Lalchhanzova chuan, LRS department-a thawkte thawhrimna leh ṭhahnemngaihna chu chhuanawm a tih thu sawiin, "Sorkar hmalakna tihlawhtling tura hma kan laknaah chhun lama nilenga mipui nena indawr tawh hnua zan lam leh pisa chawlhahte rim taka in thawk hi a ropui hle a ni," a ti.
B Lalchhanzova chuan, land record leh land administration-ah sorkar laipui leh state upa zawkte'n technology thar nena thui tak hma an lak tawh chu ûm phâk tumin theihtawp chhuah a ṭul thu sawiin, "SASCI hnuaia tih tur min tukte hun tlemte chhunga tih zawh ngai a ni," a ti a; an tih turte a huna an tih zawh theih nan thawktute chu ṭangrual zel turin a fuih.
LRS secretary Vanlalmawia pawhin LRS department-a thawkte inpekna chu ropui a tih thu sawiin, "Department kalphung leh hna kalpui danah mipui tana samkhai tur zawng zel chunga inher rem chhoh zel a pawimawh," a ti.
LRS department-a thawkte chuan record thliar leh siam rem an tih dante leh an hnathawh dante LRS Minister an hrilhfiah a; Minister leh Secretary-te'n zana an hnathawk lai an enpui chuan phûrna nasa tak a pek thu leh Minister-in zanriah a buatsaihsak avanga chu an lawm thu an sawi a ni.