Minister leh LMC hotute an inkâwm
Minister Lalrinpuii chuan September 11, Nilaini tlai khan Lunglei Municipal Council (LMC) pisa a tlawh a, LMC hotute nen Board of Council Hall-ah an inkâwm. Minister chuan, LMC hmachhawp, state sorkara bawhzui ngaiah theihtawp a chhuahpui tur thu a sawi.
Lalrinpuii hi LMC chairman Lalzuithanga leh councillor-te'n an lo dawngsawng a; LMC hmalakna hrang hrang, hmabak leh hmachhawpte tihhlawhtlin theih dan turte sawiho a ni a, LMC hotute'n harsatna leh mamawh an neihte an lo thlen.
LMC hmalakna lawmawm a tih thu sawiin Lalrinpuii chuan, hmachhawp an neih zinga state sorkara bawhzui ngaiah a bawhzuipui tur thu a hrilh a; Lunglei khawpui hmasawnna turin ngaihtuahna séng a, hmathlir thui tak neia project ṭha tak tak duang ṭhin turin councillor-te a chah bawk.
LMC Chairman chuan, LMC-a thawktu indaih lohna leh post awm sa hnawhkhah chungchanga an harsatnate sawi a; Saikuti Hall enkawlna chungchangah te, Super Market leh Multi Car Parking neih theih dan turte ngaihtuahpui turin Minister a ngen.
LMC vice chairman K Lalrinawma'n Lunglei khawpuia lirthei tlân dan leh hûn dan ruahmanna (traffic management) leh parking fee khawn chungchanga hma an lak dante sawiin, ruahmanna thar chu September 25, 2024 aṭangin kalpui a nih dawh thu a sawi a; bawlhhlawh sawngbawlna (solid waste management) lama hmalakna leh harsatnate a tarlang.
Executive councillor Zorinsanga Hmar-in finance leh technical lama thawktu indaih lohna chungchang te, sanitation lama hmalak dan te, poperty tax khawn tura hma an lak mek dante a tarlang a; executive councillor Lalhruaitluangi Sailo-in dawr hawn phalna (shop licensing), advertising & hoarding, ran khuahkhirhna, khawpui chei mawina, khawpui chhunga thing phun leh nau piang leh mitthi chhinchhiahna lama hmalak dante leh harsatnate a sawi bawk.
Inkawmhonaah hian Lunglei South bialtu MLA Lalramliana Papuia leh Lunglei West bialtu MLA T Lalhlimpuia te pawh an tel a ni.