Congress sorkar laiin nuai 322.40, MNF hunah nuai 398.07 an hmang - ZPM Ṭhalai

ZPM Ṭhalai chuan thuchhuah siamin, 'Nuam tâwl Congress MLA-te chenna in cheina atan cheng nuai 322.40 chuang hman a ni," an ti a; sorkar liam taah MNF MLA-te in cheina atana cheng nuai 398.07 hman a nih thu an tarlang.

Congress ṭhalai (MPYCC)-te'n press conference ko a, ZPM sorkara bangla/quarters luah ve lo minister-te leh CM adviser mi 10-te chenna in cheina atan cheng nuai 110 hman a nih avanga sorkar dem zawnga an au chhuak chu mipui rilru kawih her tumnaah an ngai tih ZPM Ṭhalai chuan an tarlang a, "Congress vai party zia tak tak kha a rawn lang leh niin kan hria," an ti.

ZPM Ṭhalai chuan, "Congress sorkar laiin Congress MLA-te'n an chenna in cheina senso atana an hman zawng zawng chu Rs 3,22,40,743 a ni," an ti a; kum 2018-2023 chhunga MNF sorkar laiin MNF MLA-te in cheina atan Rs 3,98,07,503 hman a nih thu leh, term hmasa leha MLA lo ni tawhte pawhin in cheina tur sum an lak nawn thu an tarlang.

ZPM ṭhalaite chuan, "Nuam tâwl sorkarin heti zat an in cheina atana an hman laia tun sorkara quarters/bangla-a awm ve lo minister-te'n an entitle an hman, an mimal thila an hman pawh ni lo, a tlangpuiah house guard duty-te riahna tur leh guard duty post sakna tura hmante an rawn sawisel chiam mai hi, Congress party zia dik tak kha term hnih an sorkar tawh lohnaah pawh a la thi lo niin a lang," an ti.

ZPM Ṭhalai chuan, "An hun laia minister leh MLA ni nawnte pawhin duh tawk nei zo loa an chenna in an chei nawn awn awn laia hetianga sorkar thar an bei mai hi mipui zah lohna lian takah kan ngai," an ti a; Congress party chu an harh chhuak zo dawn lo nia a lan thu an sawi.

Mipui sorkara minister-te'n tun hmaa sorkar ding tawhte angin nawm chen an tum ve lo nia sawiin ZPM ṭhalaite chuan, "Sorkar hmasate angin dan pêl leh a nuam tâwl zawngin ZPM kaihhruai sorkar a kal ve dawn lo," an ti a; sorkar beihna satliah leh thu dik thliar hrang thiam tura mipui an chah bakah, eptu party-te chu kalphung leh policy ṭha zawk sawi tur hre si loa ram hlui zia hmanga sorkar lai beihah an puh bawk.