Lungleiah India Fight Against HIV & STI

Mipat hmeichhiatna hman aṭanga natna inkai chhâwn theihte beihpui thlakna, Intensified IEC Campaign - India Fight Against HIV & STI' chu nimin khan Lunglei district tan Health & Family Welfare minister Lalrinpuii'n Lunglei High School tualah a hawng.

Hawnna inkhawm zawhah HIV/AIDS leh STI dona kawng-zawh huaihawt a ni a, Lunglei District AIDS Prevention & Control Committee chairman R Lal-ṭhazuala, bawrhsapin a vailiam.

Health Minister chuan, ruihhloin Mizoram a rûn mek tih sawiin, "Ruihhlo hian nun inthlahdahna a thlen a, chu chuan natna ṭha lo - HIV leh STI a tipung chak hle. Natna darh zel tur veng tur hian mi tinin nun kan uluk a, ruihhlo laka inven fimkhur leh kawppui thlan fimkhur hi kan tih tur pawimawh hmasa a ni," a ti.

Mizorama HIV/AIDS leh STI pung chak lutukin thuneitute leh thawktute a tihmangan tak zet thu sawiin Lalrinpuii chuan, "HIV/AIDS do tur hian sorkar chuan State Council on AIDS tuaithar lehin, MLA hmun thuma ṭhena hmun hnih lai telna 'Legislative Forum on HIV/AIDS' pawh din thar tum a ni a, Speaker phalna dila hmalak mek a ni," a ti a; India Fight Against HIV & STI hlawhtlinna chu mipuiteah a innghah thu a sawi rualin, sorkar aṭanga hma latute chu theihtawp chhuah turin a chah.

HFW Minister chuan, campaign hnuaiah hmalakna tur chi hrang hrang duan a nih thu sawiin, "Health worker, ASHA leh grassroot worker-te chu in tin tlawh chhuakin an hah leh dawn hle a, health worker-te pawimawhna leh hlutna a lang chiang lehzual dawn," a ti a; health worker-te pawimawhna hriain sorkarin tun hnaiah health worker 51 lakna phalna a pek thu a sawi.

Lungleia Intensified IEC Campaign - India Fight Against HIV & STIs hawnna hunah Lunglei West bialtu MLA T Lalhlimpuia, Lunglei Municipal Council chairman Lalzuithanga leh vice chairman K Lalrinawma, Health department official-te leh zirlaite an tel.

Hawnna inkhawm zawhah kawngzawh huaihawt a ni a, Lunglei College, J Buana College, Lunglei Nursing School, Lunglei High School, Lunglei HSS, Leitlangpui HSS, Electric Veng H/S, Bazar H/S, Southern Flower School, Christian Education Centre leh Bethesda HSS zirlaite an tel. Lunglei H/S tual aṭanga Tennis Court hlui thleng an kal a; HIV/AIDS laka invenna leh dona thuziakte an keng a ni.