Super Speciality Hospital leh Film City chungchang sawiho

Nimin khan chief secretary Lalnunmawia Chuaungo hoin CS Conference Room-ah Global Middas group-in Mizoram sorkara hmasawnna leh investment atana ruahmanna pahnih - Mega Film City leh Super Speciality Hospital an thehluh chungchang sawiho a ni.

Chief Secretary chuan, ruahmannate chu Mizoram leh mipuiin an hlâwkpui theih dan kawng hrang hrang ngaihtuah chungin sorkarin uluk taka a thlir a ṭul thu a sawi a, "Company-te'n Mizoramah investment an neih chu ṭha viau mah se, investment reng rengin state leh mipui tan hmasawnna a ken tel theihte uluk taka bûk leh ngaihtuah a pawimawh hmasa a ni," a ti.

Ṭhutkhawmah hian Global Middas group aiawhte'n Mega Film City leh Super Speciality Hospital an sawifiah a, zawhnate an chhang bawk. Ruahmanna pahnih chungchangah thutlukna siam a awm lo a, hun remchangah Global Middas hotute'n sorkar hotute an sawipui leh ang.

Meeting-ah hian additional chief secretary JC Ramthanga bakah, Land Revenue & Settlement department, Commerce & Industries department, IPR department, Health department leh Planning department aiawhte an tel a ni.