Samagra-a thawkte'n lawmthu an sawi; An hlawh tur pek chhuah vat an ngen

Samagra Shiksha hnuaia thawkte inzawm khawmna, Federation of Mizoram Samagra Shiksha Employees (FEMSE) chuan thuchhuah siamin, an thla thum hlawh tur sorkarin a pek chhuah tâk avanga an lawm thu an tarlang a; an hlawh lak leh tur pe chhuak vat turin thuneitute an ngen nghal.

FEMSE chuan, thla thum chhung hlawh an lak tawh loh hnuah Education minister Dr Vanlalthlana, Samagra Shuiksha State Project Director leh pisa lama hotute theihtawp chhuahna vangin hlawh an la ve thei ta tih a sawi a, "Samagra Shiksha hnuaia thawkte tan theihtawp an chhuahnaah lawmthu kan sawi. Hun lo kal zel turah mumal zawka hlawh kan lak theih nan theihtawp min chhuahsak zel turin kan ngen nghal a ni," an ti.

A hun taka hlawh an lak theih loh chhan langsar zual chu - sorkar laipui aṭanga sum lo thlengte Finance department-in a pek chhuah nghal vek ṭhin loh vang leh state sorkarin state matching share a pek tlai ṭhin vang a ni tih tarlangin FEMSE chuan, "Heng vang hian central lama instalment dang dil hun a khawtlai phah ṭhin. Tun hnuah hetiang hi thleng tawh lo se," an ti a; mumal taka hlawh an lak theih nan sorkar laipui aṭanga sum a lo thlen veleh Samagra norms anga rang taka pe chhuak tawh turin thuneitute an ngen a ni.