Lungleiah ár vulh dan inzirtir

Animal Husbandry & Veterinary depart-ment, Lunglei Krishi Vigyan Kendra (KVK) leh Kolasib-a Indian Council of Agriculture Research (ICAR) Research Complex for NEH Region, Mizoram Centre-te chuan September 11, Nilaini khan Lungleia AH&Vety conference hall-ah ar vulh hmanga khawsak tihhmasawn theih dan tur zirhona an buatsaih a, Tribal Sub Plan hnuaiah ar vulh ṭanpuina an sem nghal.

Zirhonaah hian Lunglei khawpui chhunga mi 29, Hnahthial mi 20 leh Haulawng khaw mi pakhat, an vaiin mi 50 hnenah ar notê, ar chaw, ar chaw leh tui pekna leh ar damdawi chi hrang hrang sem a ni a; Lunglei KVK-a subject matter specialist Dr David Malsawmdawngliana'n hlâwk zawka ar enkawl dan a zirtir.

AH&Vety joint director (Southern Zone) Dr Lalmakthanga tarlan danin, Mizoramah ram dang aṭanga ar note lak luh a tam a, ar vulhah Mizoram a la intodelh lo. Lungleiah ar 48,000 vel vulh ang an nih laiin, thla tin ar 13,000 talh anga chhût a ni a; Hnahthialah ar 28,000 vel vulh ang leh thla tin ar 4,500 vel talh anga chhût a ni bawk.