MSCPCR leh MHIP hruaitute inkâwm

Mizoram State Commission for Protection of Child Rights (MSCPCR) leh MHIP Gen.Hqrs hruaitute chuan nimin khan SAMETI Committee Hall-ah consultation meeting an nei a, 'Domestic Workers Welfare and Social Security Act, 2010' leh 'Illegal Female Migrant Workers in Mizoram' tih an zirho.

Consultation meeting kaihruaitu MSCPCR chairperson Jimmy Laltlanmawia chuan, Aizawl bazar hmunpui leh khaw hrang hrang bazarahte naupang, nute'n hna an thawhsan laia him leh hlim taka an lo awmna tur nau awmna hmun (creche) chungchang a sawifiah. MSCPCR houte chuan, creche mamawhna a sanzia sawiin, naupangte himna atan MHIP-te'n hma an lak theih chuan a ṭhat tur thu an sawi.

MSCPCR legal officer Priscilla Lallawmsangi'n 'Domestic Workers Welfare and Social Security Act, 2010' leh mikhual hmeichhia dan loa hnathawk (Illegal female migrant workers in Mizoram) chungchang a sawifiah. Thupui pahnih chungchangah hian zau zawka mi nâwlpui hnena zirtirna neih dan tur sawiho a ni.