Saitual khawpui ruahmanna thlirho

Saitual Town Planning and Development Committee chu nimin khan an chairman Prof. Lalnilawma, minister of state (bialtu MLA) hoin an ṭhukhawm. Google Earth Map hmanga boundary pillar hrang hrang thlirho hnuah pawm a ni.

Prof. Lalnilawma chuan, Saitual district chu district ṭhang mek a nih thu sawiin, "A ṭhan zelna turah town planning mumal tak neih a ṭul a, mipui hawi khawthawnna tur park te, insawizawina hmun open gym-te siam theih ni se," a ti a; Saitual khua cheibâwlna turah Committee-in mawhphurhna sang tak a neih thu a sawi.

Saitual DC Dr Lalngura Tlau chuan, town planning hlawhtling tur chuan VC-te'n tih bik awm loa rilru zau an put a ṭul thu a sawi a, "Chenna hmun, sumdawnna hmun, kawngpui, mihring kalna tur leh lirthei kalna turte mumal taka siam a ṭul a ni," a ti.

Chief town planning officer Zoduailova Zote pawhin thu sawiin, Saitual Town Planning chu kum 20 atan duan a nih thu leh kum 10 hnuah ennawn theih a nih thu te, chumi chhung chuan member-te'n hmathlir an neih chuan ziaka thlen theih a nih thute a sawi.