KHAWTHLIR

Thisen pe

Johnson College NSS, Red Ribbon Club leh NCC-te chuan nimin khan an college-ah thisen pek rûnpui an huaihawt a, Civil Hospital, Aizawl tan thisen unit 95 an pe a, petute mipa 79 leh hmeichhia 16 an ni.

NQAS lawm

Sialhawk Public Health Centre-in National Quality Assurance Standard a hmuh chu nimin khan lawm a ni a, deputy govt. chief whip W Chhuanawma, Tuichang bialtu MLA-in a hmanpui. MLA chuan, India ram pum huapa sorkar damdawi-in ṭha tehnaa a bial chhung damdawi-in a lang pha chu lawmawm a tih thu leh, Sialhawk PHC-a thawkte'n an mamawh an thlente chu ngaihtuah dan kawng a zawn tur thu a sawi.

Dan thar zirho

Anti Corruption Bureau (ACB) chuan an mi leh sate tan ni hnih chhung criminal law thar pathum - BNS, BNSS leh BSA zirhona an buatsaih a, nimin khan khar niin, Vigilance secretary Betsy Zothanpari Sailo-in a hmanpui. Training-ah hian Vigilance leh ACB-a thawk mi 45 an tel a ni.

Kawlphetha pe dawn lo

Power & Electricity department chuan Melriata 132KV Sub-Station-ah vawiin hian zing dar 9 aṭanga tlai dar 4 thleng hna an thawh dawn avang chhimphei khuaah kawlphetha pek a ni dawn lo tih an tarlang. Kawlphetha nei lo turte chu - Hualngohmun aṭanga Sailam inkar khua zawng zawng leh Bawlte, South Sabual, Darlung, Bawngthah khuate a ni.

Prerana project

Mamit District Working Group Committee leh USAID aiawhte chuan nimin khan Mamit DC pisaah Prerana project kalpui dan tur an sawiho a, bawrhsap Jacob Lalawmpuia'n a kaihruai. Prerana project hi USAID bultuma kalpui a ni a; chhungkaw din leh rilru hriselna lama hmalakna leh mipa/hmeichhia nih vanga indiriamna tihbona tura hmalakna a ni.