PMKMY-ah inziak lut an la tlem

Loneitute'n pension an dawn theihna tura sorkar laipuiin a rua­hman, Pradhan Mantri Kisan Maandhan Yojana (PMKMY)-ah mi 122 chiah inziak lut an la awm.

Agriculture depart­ment aṭanga Vanglaini thu dawn danin, PMKMY-ah hian Aizawl district-ah mi 28, Champhai districtah pasarih, Kolasib district-ah pali, Lawngtlai district-ah 50, Lunglei district-ah paruk, Mamit district-ah 12 leh Serchhip district-ah 15, an vaiin mi 122 an inziak lut tawh a; Siaha district-ah inziak lut an la awm lo.

Mizoramah chuan PMKMY hi September 24, 2019 khan Agriculture minister C Lalrinsanga'n a tlangzarh a, chumi hnuah loneitute tan inziah luh theih nghal a ni.

PMKMY hi sorkar laipuiin India rama loneitute ram hectare 2 aia zau neite an upat a, kut hnathawha eizawn an harsat huna pension an neih theihna tura duan a ni. Scheme hnuaiah hian loneitu mumal taka inziah luh dan tur ang thlapa inziak lutte chuan kum 60 an tlin hunah thla tin Rs. 3,000 an la thei dawn a, loneitu kum 18 aṭanga 40 inkar tan inziah luh theih a ni.

Scheme-a inziak lut duhte chu an awmna aṭanga common service centre (CSC) hnai berah Aadhaar card leh bank passbook kengin inziah luh theih a ni a, sum sên a ngai lo.

Inziak lutte chuan thla tin sum an thawh ve ang a, an thawh zat ang chiah sorkarin a thawh ve ang. Loneitu chu kum 60 a tlin hmaa a thih chuan a nupui/pasalin kum 60 a tlinin a dawng chhunzawm thei dawn a, nupaa inziak lut tan erawh chuan dawn theih a ni lo.

Aizawl    90

Lunglei    26

Siaha    11

Champhai    30

Kolasib    33

Serchhip    30

Lawngtlai    44

Mamit    31

TOTAL    295