Durtlangah darkar hnih kawng dang dawn

Durtlang khuaa YMA branch hrang hrangte intêl khawmna, YMA Joint Action Committee chuan, April 13, 2015, Thawhṭanni khian chawhma dar 9-11 chhung Leitan kawngpuiah 'Kawngpui siamṭhat phûtna inkhawm' an hmang dawn a; chumi chhung chuan kawngpui dan chah an tum.

Durtlang YMA JAC chuan thu­chhuah siamin, kum 30 kal ta khan Durtlang kawngpui zauhna atan mi eng emaw zatin phal takin ram an pe a, mahse tun thlengin kutthlak leh hmalakna a la awm lo niin an tarlang a, pawi an tih thu leh an hriatthiam loh thu an sawi.

Kawngpui metal phah chin pawh a chhe tak zet tawh a, lirthei leh mihring kal vel tan a hlauhawm tawh hle niin an sawi bawk.

Durtlang kawngpui chu thuneitute'n an ngaihthah bik nia sawiin, Durtlang YMA-te chuan, mak an tih thu leh rilru natthlak an tih thu an sawi a, "Thuneitute'n hmalak tum angin an insawi reng a, dawhthei taka kan nghah ṭhin laia tun thlenga hmalak tak tak awm si lo hi kan ngaithiam lo tak zet a ni," an ti.

Durtlang YMA JAC-te chuan Thawh­ṭannia darkar hnih chhung kawngpui an dan chhungin lirthei leh mihring tan kaltlang theih a ni dawn lo tih sawiin, hrethiam turin mipui an ngen a ni.