KHAWTHLIR
Thisen pe
Johnson College NSS unit chuan nimin khan Aizawl Civil Hospital-ah thisen unit 108 an pe a, a petute mipa 69 leh hmeichhia 39 an ni. Evangelical Nurses Fellowship member hmeichhia panga leh mipa pakhatte pawhin Ningani khan Aizawl Civil Hospital-ah thisen unit 6 an pe bawk.
April 14 chawlh
April 14, Thawlhehni khi Dr BR Ambedkar piancham a ni a, Mizoram Governor chuan Mizoram pumah chawlhah (holiday) a puang. Chawlh hian sorkar hnuaia office zawng zawng, bank leh zirna inte a huam ang.
Kawng tlang
Aizawl-Lunglei World Bank kawng, Midum khâm tawntirha kawng chhak aṭanga April 7, 2015-a lung tlain a hnawh pin chu Ningani zan dar 9:45 khan lirthei chi tin kal tlang theiha thenfai a ni.
DC-in silai kawltu inhriattir turin ti
Lunglei DC chuan hriattirna chhuahin, Ministry of Home Affairs thuchhuak angin Lunglei district chhunga arms licence neitu leh retainer zawng zawngte chu 'National Database of Arms Licence' hnuaia online registration ti vek turin a hriattir. Arms licence neitu leh kawl zawng zawngte chuan mahni bialtu BDO emaw, DC office-ah emaw form la chhuak a, kim taka fill-up a, May 2015 ral hmaa Lunglei DC office-ah thehlut tura tih an ni.
Officer meeting
Nimin khan School Education directorate conference hall-ah School Education department-a secretary thar, Manisha Saxena hoin Officers Meeting neih a ni. School Education hmalakna hrang hrang, SCERT, MBSE, SSA leh RMSA hnathawh chi hrang hrangte an thlirho. Meeting-ah hian School Education-a officer ṭhahnem tak an tel a ni.
CM Relief Fund
Chief Minister's Relief Fund-ah Ford motor proprietor chuan Rs. 20,000 a chhung lut.