Governor leh CM-in zirlaite duhsakna hlân
Governor Keshari Nath Tripathi leh chief minister Lal Thanhawla te chuan, nimina Mizoram University Convocation vawi 10-naah thu an sawi a; MZU hnuaia zir, an zirlai zir zote chu an lawmpui thu sawiin, an hma lam hun atan duhsakna an hlan.
Larsap chuan, zirlai hlawhtling tharte a lawmpui thu sawiin, an thiamnate ram leh hnam tana ṭhahnemngai taka hmang turin a fuih a, "Hma lam hunah hlawhtlinna ropui zawk a la awm a, chumi chang tur chuan ṭang zel ang che u," a ti.
Keshari Nath Tripathi chuan, MZU chu kum 14 chauh la ni mah se tunah chuan a changtlun hle tawh thu a sawi a, "Huang a zauh zel a, department ṭhahnem tak a awm tawh a, professional course-te pawh hawn belh zel a ni a, infrastructure lamah pawh hma a sawn chak hle a ni," a ti a; hmasawnna tur tam tak a la awm thu a sawi.
Larsap Tripathi chuan, MZU-ah thiamthil zirna, skill development course tam zawk hawn belh zel ṭha a tih thu a sawi a; B.Ed leh M.Ed zirna seat tam zawk awm thei se a duh thu te, tun aia ṭha zawk veivahna awm thei se a duh thute sawiin, "MZU hi kawng engkima Mizorama hmasawnna thlentu leh tichangkangtu ni thei se ka duh a ni," a ti.
Chief minister Lal Thanhawla chuan, MZU Convocation vawi 10-naa President Pranab Mukherjee a rawn tel thei chu lawmawm a tih thu sawiin, "Zirna leh kan ram tana a inpekzia tilangtu a ni," a ti.
MZU aṭanga zir chhuakte leh an chhungte a lawmpui thu sawiin, an mawhphurhnate hria a, an thiamnate ram leh hnam hmasawnna atan hmang turin a chah a, duhsakna a hlan a ni.
CM Lal Thanhawla chuan, Mizoram chu ziak leh chhiar thiam tam lamah a sang tih sawiin, chu chu hman ṭangkai thiam a ṭul thu a sawi a, "Ei leh bar kawnga kan hnathawhna tichaktu ni thei se a duhawm hle. Kan khawtlang hian ṭhalai talent nei ṭhate chhawr theiha an awmna turin zirna sang zawk kan buatsaih zel a pawimawh a, chumi atan chuan MZU hian research programme a zauh zel a ngai a ni," a ti.
Lal Thanhawla chuan, hun lo kal zel turah Mizoramah zirna in ṭha tak tak a la pian zel a beisei thu sawiin, chutiang hunah chuan MZU chu hmasawnna thar hmuh chhuahna hmunpui a nih a beisei thu a sawi a; "Khawvela university chungchuang tak takte nena intlawh tawnin, finna leh thiamna sang zawk ûmin zirtirtu leh zirlaite inkalpawhna a la ni ngei ang," a ti bawk.