SSA aṭangin zirlaibu sem chhuak ṭan

Aizawl district-a SSA sum hmanga zirlaibu a thlawna sem turte chu, nimin khan College Venga SSA Cluster Resources Centre aṭangin sem chhuah ṭan a ni.

Zirlaibu sem chhuahte hi Mizo medium school leh English medium school-a pawl 1 aṭanga pawl 8 thleng zirlai­bu a ni a; Aizawl khawpui chhunga Block Resource Centre hrang hrang - Bawngkawn, Chhinga Veng leh Si­kul­puikawnahte sikul hrang hrang sem atan pek chhuah a ni. Saitual, Darlawn leh Aibawk BRC-ahte pawh sem tur dah khawm a ni bawk. BRC aṭang hian sikul hrang hrangah zirlaibute chu pek chhuah leh a ni ang.

Mizo medium sikula sem tur zirlaibu zingah pawl 6 Mathematics leh Mizo zirlaibu a la tel lo a, English medium sikula sem turah pawl 2 leh pawl 5 zirlaibu a la kim lo bawk. Zirlaibu la kim lote chu a chhutute'n an chhut zawh veleh sem leh a ni ang.

SSA Mizoram state project director Lalhma­chhuana sawi danin, kum 2015-16 chhunga naupang zirlaibu, SSA sum hmanga lei nan hian pawisa ruahman sa a ni a, mahse sikul hrang hrangah admission tih mek a la nih avangin naupangte mamawh zat tur hi hriat chian theih a la ni lo.

SSA sum hmanga zirlaibu a thlawna sem nan hian pawl 1 aṭanga pawl 5 thleng tan zirlai pakhat zelah Rs. 150 ruahman a ni a, pawl 6 aṭanga pawl 8 thleng tan zirlai pakhatah Rs. 250 ruahman a ni.

SSA hotute chuan, April 30, 2015-ah VC leh LC inthlan tur vanga Model Code of Conduct hman a nih tawh avangin, zirlaibu sem turah hian State Election Commission remtihna lak a nih thu an sawi.