MJA member-te'n SMC hnathawh an zir

Aizawl Municipal Council (AMC) bultuma Shimla, Himachal Pradesh-a press tour nei mek MJA member 10 leh AMC hotute chuan April 9 khan Shimla Municipal Corporation (SMC) kalphung leh an bawlhhlawh sawngbawl dan an zir.

MJA leh AMC-te lo dawng­sawngtu atana SMC-in liason officer atana a dah Virendar Madan chuan, Shimla khaw­puiah septic tank a awm tawh mang lo tih a sawi a, "Sewerage lamah ṭan kan la nasa hle a, in tin deuh thaw hi pipeline-in a zawm vek a, 80% aia tam mahin pipe hmangin êk an paih tawh a ni," a ti.

Virender Madan chuan, ni chakna (solar) hmang uar tura hmalak mek a ni tih sawiin, in tinin tui lumna tur solar energy khawl theihna nei vek turin order chhuah a ni tawh tih a sawi.

SMC-in harsatna an tâwk ve fo tih sawiin Virender Madan chuan, "Pawisa hmuh nan state dang aṭanga Shimla khawpuia lirthei lo lutte hnenah green card Rs. 300 kan lo khawn ṭhin a, mahse, High Court-ah min khing a, min tihtawpsak leh tawh a, kan la inkhing leh ang," a ti.

Shimla-ah bawlhlawh paih man chu mipuiin an tum vek a, thla tin in tinah Rs. 50 khawn niin, a buaipui hna chu society kuta dah a ni. Aizawlah chuan bawlhhlawh paihna senso hi AMC-in 80% leh mipuiin 20% an tum thung. Madan chuan, motor parking-ah ṭan an lak nasat thu sawiin, "Multi storeyed parking kan buaipui mek," a ti.

Virender Madan sawi danin, Shimla-ah hian in sak a nihin sak zawh a ni tawh tih finfiahna certifcate pek an nih hma chuan electric leh sewarage connection lak theih a ni lo. In sak a nihin, a ram chinah a hma lam meter thum leh a sir leh hnung lamah meter hnih zuah tur a ni.

Bawlhhlawh sâwngbawlna hmun an tlawhnaah MJA member-te hi a hmun enkawltu Hanjer Biotech Energies Pvt. Ltd. hotute'n lo dawngsawngin, hna an thawhdan an hrilhfiah a ni.

Hanjer Biotech Energies-te bawlhhlawh ṭawih theite chu lei ṭhaah siamin, kg. 25 chu Rs. 250-in an hralh a, bawlhhlawh ṭawih thei lote chu re-defined fuel (RDF)-ah siamin, cement company-ah kg. khat Rs. 230-in an hralh thung.