MNYF-te'n HM Zira leh HPC(D)-ten Inkungkaihna an nei niin an sawi

MNF ṭhalaite chuan nimin khan Aizawl Press Club-ah thuthar thehdarhtute an kâwm a; HPC(D) nia inchhál zingah Home minister R Lalzirliana sipai nia sawi ṭhin an awm thu an puang.

MNYF president K Vanlalvena chuan, "Zira sipaite tia mi ṭhenkhate'n an sawi HPC(D) nia inchhál mi ṭhenkhatte chu May, 2014 tàwp lam khan Saiphai V/C House-ah an thleng a, heng hote hian HPC(D) mi ṭhenkhatte'n anmahni ûm an tum nia sawiin, Saiphai IR hote venhimna an dil a ni," a ti.

MNYF president sawi danin, HPC(D) nia inchhálte chu Mizoram sorkara thuneitute'n an camp-a riahtir turin Saiphai IR-te an hrilh a; mahse, IR-te chuan an camp-ah riahtir loin, police check gate-ah an riahtir a, June 5, 2014 zanah zankhuain IR-te'n an veng a ni.

K Vanlalvena chuan, June 15, 2014 zanah HPC(D) nia inchhál mi ṭhenkhatte'n Sesawngah buaina an siam avangin a tûkah Sesawnga NGO hruaitute'n koin an khua chhuahsan tura an tih thu a sawi a "Home Minister-in awm tura a tih avanga awm an nih thu an sawi tih mi rinawm tak hnen aṭangin report kan dawng a ni," a ti.

MNF ṭhalaite chuan, Darlawn SBI aṭangin HPC(D) nia inchhálte'n pawisa an la chhuak zing hlea an hriat thu an sawi a; Darlawna SBI account neitute hming leh address chiang taka Zoram mipuite hriattir turin Mizoram sorkar an phût.

MNYF hruaitute chuan, Health minister Lal Thanzara chu dâwt sawiah an puh a, "RL Pianmawia biala khaw pasarihah health clinic sak a ni tawh niin Health Minister-in a sawi a, mahse chung khaw pasarihah chuan health clinic sak a ni lo vek a ni," an ti.