Faina Hapta hman dan tur rél
Lunglei Sanitation Task Force chu nimin khan an chairman V Lalsangliana, bawrhsap hoin a pisaah an ṭhukhawm a, UDPA department buatsaih, ‘Mizoram Khawpui Fai Inelna 2020’ atana an district inpuahchah dan tur leh Faina Hapta 2020 hman dan tur an rél.
V Lalsangliana chuan, Lunglei Sanitation Task Force member-te chu khawpui faina leh thianghlimnaah thuneihna sang tak nei an nih thu a sawi a, Lunglei khawpuiin faina lama hma a sawn zel theih nan Task Force member-te chu theihtawp chhuah turin a chah.
Meeting chuan, Faina Hapta hawnna inkhawm chu October 2 zing dar 8:30-ah Convention Centre-ah neih an rél a; Covid-19 léng vangin mipui tam tak inkoh khawm theih a nih dawn loh avangin Lunglei Sanitation Task Force member-te bakah, sawm bik dang tlem tê nen hawnna hun hman an rél a ni.
Faina Hapta 2020 pual hian faina intihsiakna buatsaih leh tur a ni a, category hrang hrang - sorkar pisa, sikul, restaurant, hotel, hospital, veng/khua (VC area), bazarahte intihsiakna buatsaih a ni ang.
Kolasib-ah pawh bawrhsap Dr H Lalthlangliana hoin DC Conference Hall-ah Kolasib Town Sanitation Task Force an ṭhukhawm a; Cleanliness Week 2020 leh Mizoram Cleanliness Competition atana inbuatsaih dan tur an sawiho.
Dr H Lalthlangliana chuan, Faina Hapta hawn rualin faina lama inelna hawn a ni dawn a, kum tluan a kalpui tur a nih thu sawiin, "Lawmman vang ni loin, fai duhna vanga kan hmalakna vang zawkin lawmman hi i dawng zawk ang u," a ti a; Mizorama khawpui fai ber an nih theih thu a sawi.
Kolasib-a Faina Hapta hman tur hi Venglai Bazarah hawnna inkhawm neih tum a ni a; veng, sikul, college, pisa, bazar, hotel, thingpui leh hospital/health care category-ahte inelna buatsaih a ni ang.