Rel kawngah zangnadawmna pek thuai tum

Additional District & Sessions Court chuan, Kolasib district collector leh bawrhsap chu Bairabi-Sairang rel kawng siam tura Khamrang V/C huam chhunga ram lakah zangnadawmna pe thuai turin a hriattir a; DC office chuan pawisa pek chhuah thuai an tum nia thu dawn a ni.

Khamrang V/C huam chhunga rel kawng laihin a tihchhiat tur rama zangnadawmna an pek tur chu V/C pass 39 leh periodic patta pahnih a ni a, pawisa chu North East Frontier Railways pek tur a ni. Zangnadawmna pek tur zat belhkhawm chu Rs. 3,88,56,587 a ni a; pawisa la tam berin Rs. 20,87,595 a la ang a, a la tlem berin Rs. 4,81,561 a la ang.

Thu dawn danin, Mualkhang V/C huam chhunga rel kawngin a tihchhiat tura V/C pass hmanga ram nei mi 86 leh Hortoki V/C ram chhung Rasdali-a V/C pass hmanga ram nei mi 57-te hnenah Court chuan ram hlutna ang pe turin a hriattir tawh bawk a; square km. khatah Rs. 25 zel pe turin a ti a ni.