Chawngte-ah Chakma-te'n kawng an zawh

State Technical En­trance Examination (STEE) Rules-a Category-I hrilhfiahna Mizoram sor­karin tun hnaia tihdanglam duh loh lantir nan nimin khan Chawngte-ah Chak­ma-te'n kawng an zawh.

Kawngzawhnaah hian Chakma National Council of India, Mizo­ram president Rasik Mo­han Chakma-in thu sawiin, sorkar chu hleih nei taka dân siamah puhin, vânduaithlak a tih thu a sawi a, "Technical course zir turte tana seat hauhsakna dân hi hnam hnuaihnung zawkte ham­ṭhatna ngaihtuahsak chung­a siam tur a ni," a ti.

RM Chakma chuan, Mizoram sorkar chu a thutlûkna sût turin a ngen a, technical course zir tur Chakma leh Bru-te tan seat 20% hauhsaka dân siam turin a ngên bawk.

Kawng zawhnaah hian Mizoram Chakma Students' Union president Rupayan Chakma leh Central Young Chakma Association vice president Molin Kumar Chakma te pawhin thu an sawi. Kawng zawh tawpah Chawngte SDO(C) pisa kawtah STEE Rules copy an hâl a, Chief Minister hnena memorandum thehlûh tur SDO pisaah an thehlut nghal.