Mizote insuihkhawmna tura sorkar hmalakna

September 1-3, 2020 chhunga Mizoram Legislative Assembly session neihah khan GAD changtu chief minister Zoramthanga chuan ZPM member Vanlalhlana zawhna ziaka chhángin, Zo fate insuihkhawm lehna tura sorkar hmalaknate a tarlang.

    Tripura leh Manipur lama Zo fate nen intlawh a awlsam zawk nan Aizawl-Behliangchhip/Phuldungsei leh Aizawl- Churachandpur/Lamka inkarah MST bus tlantir tum a ni a, bus lei tuma hmalak mek a ni.

    Myanmar lama Zo fate nen intlawhpawh a awlsam zawkna atan Aizawl-Tahan inkarah bus tlantir tura hmalak mek a ni.

    Zo fate Mizoram páwna awm khawm tamna hmun 10 thlang chhuakin, 'Zo Kûtpui' hmanna atan cheng nuai 100 dah a ni. Hei hi Vanghmun (Tripura) leh Churachandpur (Manipur)-ah chiah tihpuitlin a la ni a, Covid-19 vangin hmun dangah tih a la ni lo.

    Kum tinin Chapchar Kût hman ṭhin a ni a, Aizawl district bikah chuan Zo fa, hmun hrang hranga awmte an kal mante tumsakin chah ṭhin an ni.

    Art & Culture department leh MZP ṭangkawpin kum khat dan zelah Zo fate insuihkhawm zel nan hmun hrang hranga mite sáwmin 'ZOFEST' hlimawm tak an hmang ṭhin.

.    Kum tinin hmun panga velah Mizo culture vawn nun zel nan leh Zo fate inpumkhat nan 'Cultural Meet' YMA-te nen hmanho ṭhin a ni. Border Area Cultural Meet kum tin Mizoram border-ah hman ṭhin a ni bawk.