A chhe ber atan kan inbuatsaih - Health Minister

Thuthar thehdarhtute zawh­na chhángin Minister chuan, "MoHFW thlirlâwkna ang hi thleng dik palh thei a ni. Chuvangin, a lo thleng dik a nih pawha hmachhawn thei tura inbuatsaih ngei ngei a ngai a, a nih loh chuan chêtsual a hlauhawm," a ti a, MoHFW thlirlâwkna angin thil thleng lo se tih chu an duhthusam a nih thu a sawi.

Dr R Lalthangliana chuan, Covid-19 veite enkawlna tur covid care centre (CCC) an buatsaih belh zel thu sawiin, "Vawi leh khata tihfel nghal duak theih a ni lo. MoHFW thlirlâwk anga December-ah hripui kai mi 5,000 kan nei tling a nih pawhin, a vei mek chu chu ai chuan an tlem daih thei. Chutih rualin, mi 2,000 tal enkawl theihna CCC neih ṭha kan ti a, chumi tur chuan hma kan la a ni," a ti.

Damlo na zual enkawlna intensive care unit (ICU) chu ZMC-ah 14 leh Aizawl Civil Hospital-ah 19 a awm tawh thu sawiin R Lalthangliana chuan, "Covid-19 vanga enkawl ngai zual an awm a nih chuan hengahte hian enkawl theih tura ruahman a ni," a ti a; ACH ICU-ah erawh chuan thawktu mamawh belh a nih avangin Finance department-ah an dil dawn thu a sawi.

Health Minister chuan, thawktu indaih lohnain ziaawm lam a pan thu sawiin, "Kan Chief Minister-in Covid-19 awm chhunga thawktu lak belh an nih a, an hlawh tur pek a remti a, chuvangin, thawktu lamah chuan hma kan sawn tawh viau," a ti.

Lockdown chungchanga zawhna chhangin Dr R Lalthang­liana chuan, "A boruak azirin a ṭul hun pawh a awm leh mai thei. Kan puan hnuhnun ber khan Ministry of Home Affairs-in min remtihsak lo a, mahse, Chief Minister-in, 'Kan ram boruak anni'n an hre tak tak lo' tia lockdown a remtih avangin kan kaltlangpui ta tho a ni," a ti a; CM ngaihdan chu a ngaihdan chiah a nih thu a sawi.