Ruahsur loh hunah kawng siam tum: 'A siamna tur sum a awm' - PWD Minister

Public Works department enkawltu minister Vanlalhlana chuan, ruahtui a tlak loh hunah Mizorama kawngpuite siam a nih tur thu a sawi a, "A siamna tur pawisa a awm," a ti.

Vanglaini palai zawhna chhangin Vanlalhlana chuan, kawngpuite chu siam duh mah se, ruahtui a tlâk reng avangin siam mai theih a nih loh thu a sawi a, "Ruahtui a tlak loh hunah kawng siam hna kan ṭan ang. Pawisa ngah viau lo mah ila, kawng chhe zual lai siamṭhatna tur pawisa chu kan nei," a ti a, kawng siam hlan an nghahhlelh thu a sawi.

PWD Minister chuan, Aizawl khawpui chhung kawng chhe zual lai siam mek a nih thu sawiin, "Tunlai hian kawng khuar chhe zual laite boulder hmanga hnawh a ni a, a tahtawla siam chhoh mek a ni," a ti.

Alkatra nena kawng siam chu an la ngam rih loh thu sawiin Vanlalhlana chuan, "Alkatra nena kawng kan siam hnu lawkah ruah a rawn sûr leh ṭhin a, kan kawng siamte a chhe leh nghal mai zel," a ti a; tun ang khuaa alkatra nena kawng siam chu sum khawhralna mai a nih avangin an duh rih loh thu a sawi.

PWD Minister chuan, Aizawl khawpui pawn kawngpuite pawh ruahtui tlak loh hunah a theih ang anga siam a nih tur thu a sawi a, "Cyclone Remal vanga leimin avangin kan kawngte a chhe nasa hle. Thingtlang panna kawngte a chhe em em a, chuvangin, theihtawp chhuahin ruahtui tlak loh hunah hmalak a ni ang," a ti.

Vanlalhlana chuan, PWD enkawl loh kawng tam tak Mizoramah a awm thu sawiin, "NHIDCL leh BRTF-in an enkawl mek eng emaw zat a awm. Chutihrual erawh chuan Mizoram chhung a nih avangin a ṭhat theihna atan theihtawp kan chhuah," a ti a, NHIDCL leh BRTF hotute an nawr reng thu a sawi.

PWD Minister hian an party pisaah Mizorama kawngte chu sorkar hmasa hun laia siam, fûr khat daih tura an beisei daih ta si lo a nih thu a lo sawi tawh a ni.