Vai party zinga vai party ṭha ber Congress kan ni - Lal Thanzara

Mizoram Pradesh Congress Committee (MPCC) president Lal Thanzara chuan nimin khan Congress Bhavan-a political session-ah thu sawiin, Congress party chu vai party zawng zawng zinga ṭha ber an nih thu leh chumi avanga an inchhuan thu a sawi.

Lal Thanzara chuan, Congress ṭhalaite'n ZPM mawng an hlîm san deuh avangin ZPM ṭhalaite'n, 'Vai party zia dik tak a rawn lang chho ṭan e' tiin Congress ṭhalaite an dem thu an sawi a, "Pu Lal Thanhawla'n a lo sawi tawh ṭhin angin, vai party zawng zawngah vai party ṭha ber Congress kan ni hi kan inchhuang. Puanhnuaia ZPM-te'n an zawm party ai chuan langsar taka kan zawm Congress party hi India ram leh Mizoram tan hian an ṭha thlâwt a ni," a ti.

MNF nena thawhho chungchangah Lal Thanzara chuan, "Sinlung Hills Develop-ment Council inthlanah kan thawkho dawn lo tih ka sawina a ni. Mizo takin Lai Autonomous District Council-ah chuan tluang takin kan thawkho zel dawn," a ti a; MNF nena an thawhho dawn tawh loh thu chawlhkar hmasaa a sawi chungchang a sawifiah.

MPCC President chuan, chief minister Lalduhoma tun hnaia USA-a zinin White House aṭangin chawimawina a dawng nia a lan thu leh Lengpui Airport-ah ropui taka an lo hmuah an rin thu a sawi a, "Mahse, 'Kan Chief Minister hi a rawn thleng tawh em?' tihte kan inzawt hê hû hlawm mai a, a mak ang reng hlein ka hria," a ti.

ZPM chu an kal dan tur an sawi ang zâwm lo an nia sawiin Lal Thanzara chuan, "Mipuite'n an rinna a tlahniam sâwt hle. Mi ṭhenkhatin a lehpekah chuan Congress in ni tawh ang min tih ṭhinna chhan pawh hi Congress party hian mipui hnena kan tiam leh kan ti ang kan tih chu tihlawhtling ṭhina miin min ngaih vang a ni," a ti bawk.