ASF danna damdawi siam/la lut turin Mizoram AH&Vety Minister-in a ngen

Ministry of Animal Husbandry & Dairying-in nimina Odisha khawpui Bhubaneswar-a Lok Seva Bhawan Convention Centre-ah India rama AH&Vety minister-te intawh­khawmna 'Monsoon Meet' a buat-saihah Mizoram AH&Vety minister C Lalsawivunga a tel a, ASF danna damdawi (vaccine) rang taka siam emaw, ram dang aṭanga lak luh dan emaw kawng dap turin sorkar laipui hotute a ngen.

C Lalsawivunga chuan, African Swine Fever (ASF)-in Mizoramah harsatna a thlen nasat thu sawiin, "Sorkar laipuiin ran vulhtute a chhawmdawl a ngai a, ASF vaccine rang taka siam emaw, ram dang aṭanga lak luh dan emaw kawng dap turin ka ngen a ni," a ti.

C Lalsawivunga chuan, ASF hri lêng awm thar tur ven leh hriselna kawnga sorkar laipui hmalaknaah Mizoram sorkarin theihtawp a chhuah mek thu leh a chhuah zel tur thu a sawi a; Mobile Veterinary Unit hnuaia thawkte hlawh tur sorkar laipuiin a pek chhuah thuai a ṭul thu a sawi bawk.

Monsoon Meet hi ran vulha eizawnna leh bawnghnute thar chhuahna lama sorkar hmalakna hrang hrangte sâwt zawkna tihhlawhtlin a nih theihna tura sorkar laipui, state leh union territory-te inrâwnkhawmna a ni a; Union Fisheries, Animal Husbandry & Dairying minister Raju Ranjan Singh khuallian niin, state/UT tin aṭangin minister leh official eng emaw zat an tel.

Minister C Lalsawi­vunga hi AH&Vety deputy secretary C Lalṭanpuia, deputy director Dr Thangzadinga leh deputy director Dr V Vanneihtluanga ten an ṭawiawm a ni.