AMC corporator H Lalremtluanga rinawmna thu tiamtira lâk luh a ni

Aizawl Municipal Corporation (AMC) corporator atana Ward-VI by-election-a thlan tlin H Lalremtluanga, Chanmari West chu nimin khan AMC Board of Corporators Meeting Hall-ah AMC corporator atan lâk luh a ni.

Corporator lak luhna inkhawm hi Aizawl mayor Lalrinenga Sailo-in a kaihruai a; Aizawl bawrhsap Lalhriatpuia'n H Lalremtluanga chu rinawmna thu tiamtirin corporator atan a la lut. Lak luh inkhawmah hian UDPA minister K Sapdanga, AMC corpo­rator-te leh mi pawimawh dangte an tel.

Kum 2021-a AMC inthlan­puiah Ward-VI aṭanga thlan tlin John Zosangliana chu March 21, 2024 khan a thi a, hei vang hian State Election Commission chuan August 22, 2024 khan Ward VI-ah by-election a buatsaih a, ZPM candidate H Lalremtluanga thlan tlin a ni.

Corporator thar H Lalremtluanga chuan, Ward-VI huam chhunga veng hrang hrangte enkawl leh tihhmasawn kawngah ngaihtuahna sênpui turin bial chhujnga tlawmngai pawl leh kohhrante a sáwm a, "Bialin rualkhai taka hma a sawn theih nan AMC aṭanga sum awm ang angte dik taka hman a ni ang," a ti.

Corporator H Lalrem-tluanga chuan, Ward-VI mipui tana ram leh khawtlang rawngbawl theihna hun ṭha petu Pathian chungah a lawm a, candidate-a hmangtu ZPM party leh amah thlang tlingtu mipui chungah a lawm thu a sawi.

Politics chu mi dangte leh khawtlang tana rawng­bawlna ṭangkai tak a nih theih thu sawiin H Lalremtluanga chuan, "A ṭangkai zawnga hman chuan ram leh khawtlang tan politics aia damdawi ṭha a awm chuang lo a ni," a ti.

AMC-ah hian ward 19 a awm a; corporator 10 neitu MNF party an sorkar mek a, ZPM-in corporator pasarih leh Congress party-in corporator pahnih an nei mek a ni.